BANNER NEWS: P5.8-B share dagiti tobacco producing provinces iti RA 7171, maruk-atan inton Enero 15

VIGAN CITY – Manamnama a maruk-atan ti bingay dagiti tobacco producing provinces manipud iti RA7171 iti maikadua a lawas ti Enero 2010, daytoy ti impakaammo ni House Deputy Speaker Eric Singson iti interbio kenkuana ti media itay nabiit.

Kinuna ni Singson a manamnama a ruk-atan ti Landbank of the Philippines inton Enero 15 ti bingay dagiti uppat a probinsia nga agmulmula iti tabako manipud iti excise tax kas intuding ti RA 7171 nga aggatad iti P5.8 bilion.

Maysa kadagiti intudo ni Singson a rason no apay a maruk-atan iti mabiit ti pondo tapno makatulong daytoy iti rehabilitasion dagiti probinsia a nadidigra iti napalabas a bagyo a pakairamanan dagiti uppat a probinsia nga agmulmula iti tabako a pakaibilangan ti Ilocos Sur, La Union, Ilocos Norte ken Pangasinan.

“Kasapulan daytoy tapno masimpa dagiti nadadael rangtay, kalsada, irigasion ken dadduma pay,” innayon ni Singson.

Pakadagupan ti nasao a gatad dagiti di naited ti gobierno nasional kadagiti tobacco producing provinces iti napalabas a lima a tawen.

Nupay kasta, kinuna ni Singson a maidalan ti maruk-atan a pondo babaen ti monetization agsipud “ta awan ti umanay a cash ti gobierno.”

Kinuna ti mangibagi iti maikadua a distrito ti probinsia a manamnama a maruk-atan ti pondo inton Enero 15.

Inlawlawag pay ti agilinlinteg a saan a panangarem kadakuada ti agdama nga administrasion tapno suportaranda dagiti kandidato daytoy iti masungad nga eleksion ti pannakaruk-at ti nasao a pondo.

Kabayatanna, kinuna ni Gov. Deogracias Victor Savellano a nakurang a P1 bilion ti maala a bingay ti probinsia iti maruk-atan a pondo ti RA 7171, malaksid laeng iti bingay dagiti munisipalidad.

Segun iti gobernador, naur-urnong dagitoy nga utang ti gobierno nasional agsipud ta saan a naited amin dagiti bingay dagiti uppat a probinsia nga agmulmula iti tabako kadagiti napalpalabas a tawen.

Kinuna ni Savellano a naaramiden ti monetization idi 2003 ket mangnamnama a maruk-atanen ti bingay ti probinsia tapno maiyimplementarna metten dagiti proyekto ken commitmentna.

Agdagup iti 30% ti bingay ti probinsia iti RA 7171 idinto a 40% ti mapan iti munisipalidad ken 30% porsiento iti congressional district.

Ti Ilocos Sur ti kadakkelan iti bingay iti RA 7171 agsipud ta 70% ti produksion daytoy a produkto ti aggapu ditoy a probinsia.#