BANNER NEWS: Panaglako, panagsida iti butete, permanente a maiparit: BFAR official

BANTAY, Ilocos Sur – Imballaag ti maysa nga opisial ti Bureau of Fisheries and Aquatic Resources ti saan a panagsida dagiti tattao iti buffer fish wenno butete iti sanguanan ti pannakasabidong a puon ti ipapatayda dagiti tallo a mangngalap iti Candon City gapu iti panagpulotanda iti daytoy nga ikan.

Kinuna ni Benny Saraos, BFAR officer, nga adda komunikasion a naggapu iti nangatngato a turayenda iti permanente a saan a panagala, panaglako ken panagsida iti butete agsipud ta makasabidong daytoy a pakatayan ti nagsida no saan a dagus a maasikaso.

Tallo a mangngalap  residente iti Barangay Darapidapti natay gapu iti pannakasabidongda iti pinulotanda a butete idi Mayo 5 ditoy nga ili.

Naireport a natay da Antonio Gonzalo Garpa, 51, Arnold Balbin Ramos, 45, ken Antonio Rebuca Valdez, 50, agpapada a mangngalap ken residente iti Barangay Darapidap ditoy siudad gapu iti pannakasabidongda iti pinulotanda a butete.

Segun iti inbestigasion ti polis, naggiinom dagiti biktima iti igid ti baybay ti nadakamat a coastal barangay ket nakursunadaanda nga inaramid a pulotanda ti butete, maysa a klase ti ikan a makasabidong.

Idi rumabiin, mapapati a nagsakit ti tian dagiti biktima ket intaray dagiti pamiliada iti ospital a pimmusayab da Gonzalo ken Balbin.

Pimmusay met ni Valdez iti aldaw ti Mayo 6.

Kinuna ni Saraos a nagadu nga ikan a mabalin a masida, no apay nga adda pay la dagiti mangngalap nga agsida iti butete idinto nga ammoda la ngaruden a makasabidong daytoy.

Segun iti BFAR officer, masigayan wenno mapana ti butete ket naimas a pagpulotan aglalo no maadobo.

Adda dagiti mangngalap a mangipatpatengteng a nagsidada metten iti butete ngem saanda met a naan-ano. Adda pay dagiti mangibagbaga a saan a makasabidong ti butete no la ketdi madalusan ken maikkat ti apro, dalem, ken siit daytoy ken maluto a naimbag.

Segun iti maysa a mangngalap a dina kayat ti mainaganan, naimas ken nanam ti butete aglalo no maadobo.

“Liklikanyo ti agsida…saanyo nga ipatengteng ti agsida iti butete… saantayo nga agpaspasarak… saantayo nga ammo ti desgrasia,” impalagip ni Saraos.

Kinuna ni Saraos a saan nga agsardeng ti laboratorioda nga agsuksukisok  tapno maduktalan dagiti lames a makasabidong.

“Iti Ilocos Sur, safe nga agsidatayo iti bunog ngem iti Pangasinan adda maysa a klase ti bunog a makapatay,” dinakamat ni Saraos. #