BANNER NEWS: Panagrehistro ti electric coop iti CDA, saan a pabor dagiti ISECO officials

SANTIAGO, Ilocos Sur – Saan a kumanunong dagiti opisial ti kooperatiba ti elektrisidad ditoy probinsia a maiyakar ti pannakaimaton daytoy iti Cooperative Development Authority.

Inulit dagiti opisial ti Ilocos Sur Electric Cooperative, Inc. (ISECO) daytoy a  pagtaktakderanda mainaig iti addang ni COOP-NATCCO Party List Representative Jose Ping-ay a pannakaiyakar ti pannakaimaton dagiti electric cooperatives iti CDA manipud iti National Electrification Administration (NEA) bayat ti naangay a press conference iti opisinada ditoy idi Disiembre 11.

Segun ken ni Engr. Egdon Sabio, awan pay ti makitada a pagsayaatan ti ISECO iti ibaballasiwna iti CDA agsipud ta awan ti kabaelan ti CDA a mangpasayaat kadagiti electric cooperatives gapu ta saanda a pamiliar iti klase daytoy a kooperatiba.

“Nairuam ti CDA kadagiti multipurpose ken credit cooperatives a 246 laeng ti average a miembroda idinto nga umabot iti nasurok 134,000 ti miembro ti ISECO. Kas ipakita ti estatistika, adda 76,611 a nakarehistro a kooperatiba iti pagilian ngem 23,836 laeng ti aktibo kadagitoy. Kayatna a sawen, saan a kabaelan a kitaen daytoy ti CDA,” impalawag ni Engr. Sabio.

Innayon pay ni Sabio a no mapatuloy ti iyaakar ti ISECO iti salinong ti CDA, dagiti dadakkel a consumers ti mabenepisiaran ta kas sagudayen ti linteg dagiti kooperatiba, dagiti dakdakkel ti sharena ti maipaayan iti dakdakkel a dibidendo ken patronage refund.

Kinuna ni Sabio a no mairehistro ti ISECO iti CDA, maulaw daytoy no ania a klase ti kooperatiba ti pakaibilanganda, no iti service cooperative wenno iti electric cooperative nga agpada a karaman iti 20 a klase ti kooperatiba kas ibagbaga ti CDA.

Kabayatanna, impalgak ni Sabio a maipasdek ti 5 MVA sub-station iti Sta. Cruz ken maysa pay a 5 MVA sub-station iti Cabugao tapno maisagana ti  ISECO iti dumakdakkel a pagkasapulan iti koriente iti masanguanan.

Kinuna ni Sabio a dagitoy ti tumulong a mangsupusop iti pagkurangan dagiti uppat a sub-stations a pakairamanan ti Candon sub-station (15 MVA); Narvacan sub-station (10 MVA); Vigan sub-station (15 MVA ken 10 MVA) ken Sto. Domingo sub-office (10 MVA) tapno maliklikan ti panagbaba ti boltahe ken panagkurang ti suplay ti koriente iti probinsia.

Nairamanen dagiti nasao a proyekto kadagiti naikalendario a marugian inton umay a tawen, kinuna ni Sabio.

Nupay kasta, kinuna ni ISECO General Manager Cesar Gironella a madamada pay laeng a kitkitaen ti mabalinda a pangalaan iti pondo para kadagiti nadakamat a proyekto ta umabot iti P86 milion ti mausar iti Sta. Cruz ken P90 milion ti kasapulan para iti maipasdek iti Cabugao.

Kinuna ni Gironella a sumaruno a plano ti ISECO ti computerization ti  kooperatiba tapno uray iti internet ket makitan dagiti consumers ti nakunsomoda a koriente ken  mabalinda payen ti agbayad iti  online.

“Saanmi met nga irikep ti ruanganmi mainaig iti iyaakar ti ISECO iti CDA. Ngem ketdi agsiputtayo nga umuna. No makitatayo a simmayaat ti kasasaad dagiti immakar nga electric cooperatives, apay ketdin a ditayo tuladen ida? Ngem no makitatayo nga awan nagbaliwanda wenno lalo pay a bimmaba ti kasasaadda, agtalinaedtayo laengen iti salinong ti NEA nga uppat a pulon a tawen a mangkitkita iti pagsayaatan dagiti electric cooperatives,” kinuna ni Sabio.#