BANNER NEWS: Pangulo ti committee on revenues, nagikkat gapu iti kuestion panagbuis ti ISECO

VIGAN CITY – Nagrubbuat ti deliberasion iti saludsod no ipasa ti kooperatiba ti elektrisidad kadagiti agindeg ditoy no mapagbuisda ngem nagsanga iti bagas ken agas ket nagtunged iti panaglusulos ti chairman ti committee on revenues iti puestona.

Nagramut ti “highly emotional” a deliberasion iti ordinansa ni Konsehal George Villanueva a mangbuis iti Ilocos Sur Electric Cooperative (ISECO) idi sinaludsod ni Konsehal Audie Agdamag no ipasa ti kooperatiba kadagiti agindeg iti siudad ti buis a  singiren ti Vigan City kadakuada.

Nupay insungbat ni Villanueva nga adda pakpakauna a commitment ti ISECO a dida ipasa kadagiti agindeg ti bayadanda a buis iti Vigan City, saan a napnek ni Agdamag ket sinaludsodna no maiggaman dayta a balikas ni Villanueva a nagkunaan ti naud-udi a prerogatibo daytan ti kooperatiba.

Insingasing ni Agdamag a kasaritada pay ti ISECO tapno ammuenda ti pagtaktakderan daytoy agsipud ta agrigrigat dagiti tattao ket saan koman a nayonan pay ti “asin iti sugatda” ngem impetteng ni Villanueva a nalpasen ti public hearing idinto nga innayonna a saan met a kuinestionaran dagiti padana a konsehal idi damo a maidatag ti nasao nga ordinansa.

“Awan ti maaramidantayon no kastoy, Madam Presiding Officer,” kinuna ni Villanueva. Ni Konsehal Lourdes Baquiran ti nagtugaw a presiding officer ta acting mayor ni Vice Mayor Franz Ranches.

“Apay, narigat la kadin a mangangaytayo iti sabali a public hearing…? kinuna met ni Konsehal Benjo Verzosa.

Kinuna ketdi ni Villanueva a “…pagrigatanna kadagiti konsehal ta dida met agatendar (public hearing) ket sada ita kuestionaran (ordinansa)?”

Sinalakniban ni Konsehal Loreto Quibilan ni Villanueva ket kinunana a naidatagen ti gakat para iti deliberasion ket saanen a kasapulan ti pannakaisayangkat ti sabali a public hearing sana inyunay-unay a “masapul nga ipakitatayo ti kaadda iti political willtayo.”

Nangisingasing ni Konsehal Ever Molina iti kumpromisio a solusion tapno madepdep ti bumarbara a diskusion: saanen a public hearing ti maangay no di konsultasion no ania ti  opisial a pagtaktakderan  ti ISECO.

Kinuna ni Verzosa “nga awan ti mangdikdiktar kadatayo…” ket “…kitaen koma ti sangguniang panlungsod ti pagsayaatanna (constituents) saan laeng a ti pagsayaatan ti gobierno”.

Imbales ni Villanueva a  “political risk” kenkuana ken isu ti talaga a mataltal iti panangidatagna iti ordinansa  ket ammona a “sakripisio amin a tattao” ngem inyunay-unayna nga “apitentayonto ti bungana”  babaen ti napinpintas a “serbisio a maiyawattayo kadagiti tattao iti Vigan”.

“…Agmulatayo itan…ta daytoy a mulatayo, apitentayo met laeng iti masakbayan,” kinuna pay ni Villanueva.

Ngem kinuna ni Verzosa a nakanginngina ti gasolina, nakanginngina ti presio dagiti tagilako, ken ti bagas, “tapos pespesen pay laeng dagiti tattao… padaraentayo ti awan daranan… sana innayon “nga agpayso nga ad-adu ti ingresotayo, ad-adu ti itulongtayo kadagiti tattao, ngem parigatentay met dagiti tattao…”

Ngem impalagid  ni Quibilan nga uray ti agas, agkurkurang ken nakanginngina, ket “masapul nga adda pundotayo a pangtulong kadagiti tattao, saan laeng a iti agrikultura no di pay iti benneg ti salun-at”.

Ngem sabali ti nagawatan  ni Verzosa iti pannakadakamat ti agas ket kinunana a “personal daytan, pati negosiotayo, madakamatdan… ”

Adda ngamin parmasiutika ni Verzosa.

Ditoy nga imbatad ni Villanueva ti panangisanudna iti ordinansa  ta “saanna a kayat  a dayta ti saantayo a panagkikinnaawatan” nupay gagemna ti makaputar “iti ordinansa a namnamaek makatulong (met koma ) iti kaban ti gobiernotayo…”

Kasaruno dayta ti panangiwaragawagna nga aglusulos metten iti puestona kas chairman iti committee on revenues.#