Footer

BANNER NEWS: Pannakabangon iti dam sadiay Salcedo, supiaten dagiti umili

SALCEDO, Ilocos Sur – Supiaten dagiti adu nga umili iti Salcedo ken kabangibangna nga ili ti pannakabangon ti dakkel a water impounding project wenno dam iti Buaya River ta patienda a dayta nga uray no makaipaay kadagiti iti pagsayaatan ngem ad-adu nga amang dagiti mabalin a parnuayenna a pagdaksan.

Dayta ti nagkaykaysa a tarigagay dagiti umili iti plano a pannakabangon iti multi-billion Gregorio del Pilar Water Impounding Project wenno dam iti Buaya River kabayatan ti naangay a public hearing nga inatenderan dagiti maseknan nga opisial ken agserserbi ti gobierno ken umili iti Salcedo, Sigay ken Del Pilar.

Naangay ti public hearing iti Muncipal Gymnasium idi Hunio 27, 2018. Dinar-ayan daytoy dagiti adu nga umili ken opisial ti Munisipal a Gobierno ti Salcedo iti panangidaulo ni Mayor Leopoldo Gironella Jr., da Sangguniang Panlalawigan Member Pablito Sanidad Jr. ken SPM Christoper Baterina a nangibagi ti Provincial Government; dagiti opisial ti National Irrigation Administration; dagiti mangibagbagi iti Engineering and Development Corporation of the Philippines; pannakabagi ti 81st Infantry Battalion ti Philippine Army, ken dadduma pay nga stakeholders ken maseknan iti proyekto.

Impakaammo dagiti pannakabagi ti NIA ti pakabuklan ti proyekto a dam nga agtayag iti 89 a metro sadiay labes ti Bago Resort, Salcedo. Inlawlawagda dagiti maipaayna a pagimbagan kadagiti umili a pagtaudan ti irigasion a mangpasayak kadagiti nasurok a 5,000 nga ektaria ti kataltalonan iti Salcedo, Candon City, Banayoyo, Del Pilar, Sigay, Santa Lucia ken Santa Cruz. Impakaammoda pay ti pannakabangonto ti mini hydro electric plant a pagtaudan ti koriente, ken pannakapaadda dagiti nasurok a 24,000 nga ektaria a pamupukan ti lames wenno fish cages, ken dadduma pay a pagimbagan a mangpadur-as ti kasasaad dagiti umili. Inlawlawagda a mabenepisiaran dagiti nasurok a 8,000 a pamilia kadagiti ili ken siudad iti Abagatan a paset ti Ilocos Sur iti progreso a patauden ti proyekto.

Iti laksid dagiti nairakurak a pagimbagan ti proyekto, nagkaykaysa dagiti adu nga umili a nangiyebkas ti panangkontrada iti pannakabangon ti dam iti ilida ta maapektaran ti pagbiagan ken pagnaedan dagiti agindeg kadagiti barangay a madalapud ti dam.

Agamak dagiti umili iti mabalin a dakes a parnuayen ti pannakabangon iti dam, iti pannakapapanaw dagiti agindeg kadagiti lugar a pakaisayangkatan ti proyekto; pannakapukaw dagiti taltalonenda a pagtaudan ti kanen ken taraonda; pannakaapektar dagiti ubbog ken pagtaudan ti danum a kasapulan dagiti umili; ken ti pangta ti parnuayenna a nakaro a layus ken didigra no maibuang, agluppias wenno madadael ti dam.

Impalgak dagiti umili a no maibuang ti danum iti dam, ket agluppias ti karayan a manglayus kadagiti adu a balay ken nalawa a kataltalonan iti barangay ti Bulala Leguey, Madarang, Baybayading, Ubbog, ken Balidbid iti Salcedo; ken ti Barangay Concepcion iti ili ti Del Pilar; a mangdadael kadagiti kalsada ken imprastraktura ken sanikua iti ili ti Sigay ken Del Pilar. Impaganetgetda a mabalin a ti mapenned a danum ti dam ti agparnuay iti didigra kas ti panagregggaay wenno panagteppang ti daga. Agamakda a no matuloy ti proyekto ket mapapanaw dagiti agindeg kadagiti maapektaran a lugar ket mayakarda iti pagnaedan.

Impatangken dagiti umili iti panangkontrada ti pannakabangon ti dam iti Salcedo, ken kinanunongan da Atty. Marvin Biligan, abogado dagiti katutubo nga umili wenno Indigenous People, SPM Sanidad, SPM Baterina, ken dagiti opisial ti lokal a gobierno ti pagtaktakderan ken tarigagay dagiti maseknan nga umili iti pannakabangon ti proyekto.

Sakbay ti public hearing iti Saldedo idi Hunio 27, naangay ti kellaat a panag-rally dagiti agarup 150 nga umili ken supporter-da iti Plaza Salcedo iti sango ti Provincial Capitol a nakaalarmaan dagiti agindeg ken sangaili iti Vigan gapu ti kaadu dagiti polis a nakasagana a mangtagiben ti urnos ken talna iti aglawlaw.

Naammuan nga indatag dagiti pannakabagi dagiti rallyista iti Provincial Capitol ti panangsupiatda iti proyekto a pannakabangon ti dam iti ilida. Kalpasan ti panagsarita dagiti speakers, nakappia met laeng a pimmanaw dagiti rallyista.

Naammuan pay a sakbay ti panag-rally iti sango ti kapitolio ken public hearing iti Salcedo ket inyumanen dagiti municipal officials ti proyekto iti Provincial Government ken impatalged dagiti opisial a masurot ti pangngeddeng dagiti maseknan nga umili.

Naammuan iti panagsukisok a ti plano a mabangon a dam ket mairaman iti Build, Build Program ti administrasion, ken addaan iti pakauna a pondo a P3.83 Billion. Agtaud ti pondo iti utang ti Pilipinas iti China Export Import Bank. (Eden Alviar)