BANNER NEWS: Pannakaibasura ti petisionna agresidensia iti Narvacan, inapela ni Chavit

VIGAN CITY – Imballaag ni dati a Governor Luis “Chavit” Singson a posible nga
agtaray iti nangatngato a posision no “sutilen” latta dagiti agdama nga agtuturay iti Narvacan mainaig iti panagaplikarna a botante iti daytoy nga ili.

Daytoy ti reaksion ni Singson mainaig iti pannakaibasura ti petisionna a mangiyalis iti residensiana iti Barangay Sulvec, Narvacan manipud iti Vigan City.

Idi Enero 19, 2015, iti butos a 2-1, imbasura ti Election Registration Board ti petision ni Singson a mangiyalis iti residensiana iti Barangay Sulvec, Narvacan gapu iti rason a lack of residency ken saan a nakappapati nga agnaed iti simple unay a balay, awanan iti personal a gamit kas iti aruaten, toiletries, paglutuan iti uneg a mangipatalged nga agnanaed (Singson) iti dayta a balay.

Nagbutos ni Narvacan Election Registrar Babelyn Guirnalda ken ni District Supervisor Alegria Molina kontra iti petision ni Singson idinto a pabor ni Treasurer Zenaida Salang.

Ngem kinuna ni Singson a nangipila iti apela mainaig iti desision ti ERB, ket no maabak, mapan iti nangatngato a korte.

Impakaammo pay ni Singson a gapu ta dida patien nga agnaed iti bassit a balay, gimmatang iti dakdakkel, ket no didanto pay laeng patien, gumatangto manen iti dakdakkel pay.

Kinuna ni Singson a planona laeng ti tumaray a kas konsehal tapno “tumulong kadagiti taga-Narvacan” ngem no agtuloy a ‘sutilenda’ agtaray iti nangatngato a posision.

Dinakamatna a napalubosan pay ni Diputado Eric Singson nga agnegosio iti Vigan City, apay ketdin a saan koma a mapalubosan nga agnaed iti Narvacan agsipud ta panggepna ti tumulong kadagiti tattao ditoy?

Ngem pinaglibakan ni Mayor Zuriel Zaragoza nga adda pannakaibiangda iti desision ti ERB a nangdiskualipika iti petision ni Singson a mangiyalis iti residensiana iti Narvacan City.

Kinuna ti mayor nga awan ti tiempoda a mang-entertain iti tignay ti dati a gobernador a mangiyalis iti residensiana iti Narvacan.

Segun iti maysa a political analyst, ti addang ni Singson nga agbalin a botante iti Narvacan ket paset iti plano a mangpingas iti bileg dagiti ag-Zaragoza, nangruna ken ni NTA Administrator Edgardo Zaragoza a maipalpalapayag nga adda met planona a kumandidato a para gobernador iti sumaruno nga eleksion.

Anak ni Chavit Singson ni Gov. Ryan Singson a mapapati a puntiria ni NTA Administrator Zaragoza a sanguen iti eleksion inton 2015.#