BANNER NEWS: Pannakaitabon ni Marcos iti Libingan ng mga Bayani, pabor ni Sen. Escudero

CANDON CITY – Pabor ni Senador Francisco “Chiz” Escudero iti pannakaitabon ni sigud a presidente Ferdinand Marcos iti Libingan ng mga Bayani.

Daytoy ti imbatad ti senador bayat ti interbio kenkuana ti lokal a media idi dimmar-ay iti Tobacco Festival a naangay idi Marso 25 kas paset ti panagpiesta daytoy a siudad.

Ni Sorsogon Cong. Salvador Escudero III, ama ti senador, ti autor ti resolusion a nangidagadag ken ni Pres. Benigno “Noynoy” Aquino III a palubosanna ti pannakaitabon ni Marcos iti Libingan ng mga Bayani.

Pinirmaan ti 204 nga agilinlinteg iti Kamara ti nasao a resolusion.

Maipalagip a nagpaay a Minister of Agriculture ti laklakay nga Escudero iti administrasion daydi Marcos.

Kinuna ni Sen. Escudero a dua ti kangrunaan a rason no apay a pinutar ti amana ti resolusion a maidulin ni Marcos iti Libingan ng mga Bayani: kas panangipakitana iti loyalty ken utang na loob iti nagserbianna a sigud a presidente ken tapno umaddang nga agpasango ti pagilian.

Naiduron ti nasao a resolusion kalpasan ti pannakaitabon iti nasao a kamposanto ni dati nga AFP Chief of Staff Angelo Reyes  a nangkettel iti biagna babaen ti paltog idi kapudot ti pannakadengngeg iti Senado ti mapapati a “pabaon” a naited kadagiti nagretiro a hepe ti AFP.

Kabayatanna, nagtalinaed ti Malakaniang a naulimek mainaig iti singasing a maitabon ni Marcos iti Libingan ng mga Bayani.

Ngem kinuna ni Presidential spokesperson Edwin Lacierda a naipakumiten ken ni Vice Presidente Jejomar Binay ti pannakaadal ken pannakabuangay ti maysa a komite a mangadal iti nasao a proposal.

Kinuna met ni Binay a konsultaenna dagiti nadumaduma a partido politikal ken NGOs iti pagilian mainaig iti nasao a singasing.

Maipalagip a maysa ni Binay kadagiti naibalud idi panawen ti Martial Law nga impasdek daydi Marcos ken nangipaay iti libre a serbisio legal kadagiti biktima ti panagabuso bayat ti rehimen ti napadisi nga strongman.

Kinuna ni Sen. Escudero nga ikkanna iti waya ni Sen. Ferdinand “Bongbong” Marcos a mangipila iti gakat iti Senado.

“Nakasaganaak a sumuporta iti dayta a resolusion ken gakat,” kinuna ni Escudero.

Inyunay-unay ti senador a rumbeng laeng a ti “sanguanan ti kitaen iti yaaddangtayo ta no kumitkitayo laeng iti likud, posible a maitublaktayo.”

“Umaddang ken kumitatayo iti sanguanan tapno makaabantetayo kas maysa a pagilian ken maysa a puli,” kinuna ni Escudero.

Ipetpetteng ti pamilia ni Marcos a rumbeng laeng a maitabon ti dati a Presidente iti Libingan ng nga Bayani.

Kinuna ni Sen. Ferdinand “Bongbong” Marcos a maysa a soldado ken bannuar ti gubat ti amana ket rumbeng laeng a maipaayan iti pannakaitabon a maysa a bannuar.

Ngem adda dagiti agilinlinteg a nangibatad iti saanda a yaanamong iti pannakaitabon ni Marcos iti Libingan ng mga Bayani.

Kinuna ni Deputy Speaker Erin Tañada, a “maysa a panangliput kadagiti pudpudno a bannuar ti pagiliantayo ken iti espiritu ti Edsa ti panangsuporta iti nasao a singasing.”

Awan pay ti nalawag a pagtaktakderan ni House Speaker Sonny Belmonte minaig iti singasing. Kinunana ketdi a maysa daytoy a nawaya a panangiyebkas iti panirigan dagiti umili.#