BANNER NEWS: Pannakapaltog ti radio anchorman, kinondenar kamkameng ti media

VIGAN CITY – Kinondenar dagiti kamkameng ti media ditoy probinsia a pakairamanan daytoy a pagiwarnak ti pannakapaltog ti news reporter ken anchorman iti maysa a lokal a radio idi rabii ti Enero 7 iti Bulag Sentro, Bantay, Ilocos Sur.

“Idanonmi ti panangkondenarmi iti daytoy a panangdangran ken ni Commando Uno, daytoy ket kaipapananna ti pannakadangran metten iti pagsapulan dagiti kameng ti media…” kinuna ti statement nga impatangatang ti DWRS kalpasan ti pannakapaltog ni Eugene Paet, ad-adda a mabigbig a kas Commando Uno, news reporter ken anchorman iti nasao a lokal nga estasion.

“…Kalikagumanmi a mapaggaraw ti amin a benneg ti inbestigastion ti polisia para iti pannakaipakat ti hustisia,” paset ti statement.

Innayon ti statement a “masapul a mapagsungbat iti linteg ken mapatawan iti maitutop a pannusa dagiti responsible iti daytoy a pammaltog.”

Napaltogan ni Paet bayat ti panagdaliasatna iti national highway a sakup ti Bulag Sentro, Bantay, Ilocos Sur nga asideg iti pagpikuran a mapan iti PNP provincial office iti pasado alas 7 ti rabii ti Enero 7. Kagapgapu ni Paet manipud iti DWRS kalpasan ti programana nga Operation: Commando manipud alas 6 agingga iti alas 7 ti rabii ket aggawiden idi pinaltogan ti dua a lalaki a nakalugan iti nalabbaga a Yamaha RS a motorsiklo nga awanan plaka.

Iti baet a nasugatan, nabaelan ni Paet ti nagpaarayat iti maysa a balay ket mapapati a daytoy ti nakalapped kadagiti pimmaltog a mangsurot a manguloy kenkuana.

Intaray dagiti nagresponde a kamkameng ti 103rd PPMG ni Paet iti Metro Vigan Cooperative Hospital a nakaoperaranna.

Sinawar met dagiti nagresponde a polis Bantay dagiti suspetsa ngem dida nabirokan dagitoy.

Segun iti polis, cal. 45 ti naaramat iti pammaltog kas maibasar iti dua a kapsula ken maysa a deformed slug a narekobre iti nakapasamakan ti krimen.

Di pay ammo no ania ti motibo iti pannakapaltog ni Paet idinto a masuspetsa a hired killers dagiti nangpaltog kenkuana.

Naglasat ni Paet iti sumagmamano nga oras nga operasion sa naipan iti ICU a pakaobserbaranna.

Segun ken ni Dr. Ernesto Tagorda, Jr., maysa kadagiti nangoperar ken ni Paet, naapektaran ti bituka, dalem ken diapraghm ken naikkat ti pali daytoy.

Kinuna ti nasao nga statement nga “…agserbi laeng daytoy (pammaltog) a maysa a karit kenkuana (Paet) ken kadagiti kameng ti media tapno annongenda ti pagrebbenganda iti nagan ti kinapudno…”

“Kasapulan itattan nga ipaneknek ti polisia iti probinsia, a ti Ilocos Sur ket saan a kas iti dadduma a lugar nga adda pangta ken peggad iti biag dagiti kameng ti media…” kinuna pay ti statement.#