BANNER NEWS: Pannakarakrak istruktura ti black sand mining iti 2 coastal barangays iti Ilocos Sur, imbilin ni DoJ Sec. de Lima

CAOAYAN, Ilocos Sur – Nagsaruno a rinakrak ti nagtitipon a bunggoy ti National Bureau of Investigation ken Mines and Geosciences BureauĀ  dagiti istruktura a maar-aramat iti illegal a panagminas iti black sand iti Barangay Caparacadan ditoy nga ili ken iti Barangay Nagtupacan, San Vicente, Ilocos Sur idi aldaw ti Agosto 5.

Binayabay dagiti kameng ti Philippine Army, Philippine National Police, Philippine Navy, ti panangparakrak da NBI, Manila Head Agent Sixto Comia, ken ti hepe ti Environment and Wildlife Protection and Investigation Division, dagiti nasao nga istruktura iti sanguanan ti mapapati a panagtultuloy ti operasion ti kumpania dagiti Chinese nationals a panagminas kadagiti nadakamat a barangay idinto nga addan naipaulog a cease and decease order nga impaulog ti MGB, Region 1 idi pay la Enero 22 daytoy a tawen.

Kinuna ni Comia nga impatungpalda ti verbal a pammilin ni Secretary of Justice Leila de Lima a ma-demolish dagiti istruktura ti panagminas kadagiti nadakamat a barangay.

Pinadas ti abogado ti kumpania ti minas a lapdan ti pannaka-demolish dagiti istruktura ken nagpatangda ken ni De Lima ngem imbilin ti sekretaria ken ni Comia nga ituloyda ti panangrakrakda kadagiti istruktura.

Kinuna ni Comia nga illegal ti panagminas dagiti Chinese iti black sand iti Caparacadan, Caoayan ken iti Nagtupacan, San Vicente, agsipud ta awan ti permit a naited kadakuada nga agminas kadagitoy a coastal barangays.

Kabayatanna, nagturong a mismo ni Gov. Ryan Singson iti Barangay Nagtupacan iti Sto. Domingo tapno kitaenna ti pannakarakrak dagiti istruktura nga impatakder dagiti Chinese nationals para iti panagminasda iti black sand.

Impasingked ni Singson iti demolition team a no ania ti pammilin ni DOJ Secretary, isu ti masurot.

Kinuna ni Singson a naipatakder dagiti istruktura iti no go zone ket no ā€œania ti linteg, isu ti surotentayo.ā€

Kinuna ni Comia a nagtignayda kalpasan a dimmanon iti imatangda ti illegal a panagminas iti black sand iti Ilocos Sur ken kas panagtungpal iti pammilin ti sekretario ti DoJ a mangpasardeng iti daytoy nga illegal nga aktibidad.

Idi Pebrero 9, 2013, maysa a prayer rally ti naangay iti Plaza Burgos, Vigan City a nangidariragan dagiti multi-sectoral groups iti pannakaisardeng iti black sand mining iti probinsia.

Indauluan dagiti papadi iti Arkidioses ti Nueva Segovia ken mamadre, karaman dagiti nagrali ti Defend Ilocos Against Mining Plunder, Save the Abra River Movement, Ilocos Sur Collective Actions for the Protection of the Environment, Sinait Collective Action for the Protection of the Environment, Bayan Muna,Ā Ā  Gabriela, Kabataan, Integral Youth Ministry, Nueva Segovia Social Action Center, ken College Editors Guild of the Philippines-Ilocos Sur.

Nagpirma dagiti ralista iti petision ken ni Presidente Benigno Aquino III iti panangpasardengna iti panagminas iti black sand iti Ilocos Sur.

Kinuna ni ComiaĀ  nga adda cease and decease order iti operasion dagiti Chinese nationals idi Hulio ket naikkanda iti pito nga aldaw a mangrakrak kadagiti istrukturada.

Iti baet daytoy, nakatakder pay dagiti istruktura isu nga impatungpalda ti pammilin, kinuna ni Comia.

Ngem awan ti Chinese national a naaresto idi insayangkat dagiti otoridad iti demolision kadagiti istruktura.

Nupay kasta, kinuna ni Comia nga addan listaanda dagiti Chinese nationals a nagisayangkat iti panagminas ket daytoy ti isubmiteda iti Bureau of Immigration.#