BANNER NEWS: Pannakasuspenso ti permit nga agikuyog iti armas iti ruar, inrekomenda ti PNP regional director

SAN FERNANDO CITY – Inrekomenda ti regional director ditoy iti PNP chief ti madagdagus a pannakasuspenso ti pannakaiyisio ti permit a mangikuyog iti armas iti ruar ti pagtaengan iti sumagmamano a lugar ti La Union, malaksid laeng ti agtultuloy nga operasion ti polis kadagiti lugar a pagrairaan ti kinadamsak,

Kinuna pay ni Chief Superintendent Franklin Jesus B. Bucayu, regional director ti Region 1 bayat ti command conference a naangay iti Provincial Police Office ditoy idi Nobiembre 20 nga imbilinna ti pannakabukel dagiti special operation task groups (SOTGs) a mangsiput iti amin a kita ti kinadamsak iti rehion kas panagrespondena iti pannakairaman ti Ilocos Sur, Pangasinan, ken La Union kadagiti sangapulo ket lima a high risk provinces iti masungad nga eleksion.

Itay nabiit, inwaragawag ni Interior and Local Government Secretary Manuel Roxas II dagiti 15 a probinsia a maibilang a high-risk areas a posible a pakapasamakan ti kinadamsak iti eleksion inton Mayo 2013 a pakaibilangan ti Abra; Pangasinan, Ilocos Sur, ken La Union, iti Region 1; Cagayan iti Region 2; Pampanga ken Nueva Ecija iti Region 3; Batangas ken Cavite iti Region 5; Masbate (Region 5); Samar (Region 6); Misamis Occidental (Region 10); ken Maguindanao, Lanao del Sur ken Basilan, agpapadada amin nga adda iti  Autonomous Region in Muslim Mindanao (ARMM).

“Kas maibatay kadagiti data kadagiti napalpalabas nga eleksion nga inukkon ti DILG ken ti PNP, maikonsidera dagitoy 15 a probinsia a nangato ti risgona, kayatna a sawen, mabalin a pakapasamakan iti nadamsak nga insidente nga adda pakainaiganna iti eleksion,” kinuna ni Roxas idinto nga innayonna nga iprioridadda ti pannakaisagana ti seguridad para iti eleksion.

Dinakamat pay ti sekretario nga addan walo a pammapatay iti La Union iti napalabas a lima a bulan.

Ngem kinuna ni Bucayu nga iti pannakairaman ti Ilocos Sur, La Union, ken Pangasinan nga adda iti babaen ti komandansiana, agbalinda a karit ken inspirasion iti kapolisan ken iti komunidad tapno ad-adda pay nga agtitipkelda maikontra iti kinadamsak.

Kanaig daytoy, malaksid iti naing-inget a kampania maikontra iti agraira nga armas babaen kadagiti maipasdek a checkpoints ken pannakaipakat dagiti search ken arrest warrants, iwayat pay ti PRO1 ti Oplan “Spikes” (Stop PAGS in Ilocos Region to Keep the Elections Safe), napingpinget nga intelligence operations, pannakaipakat ti istrikto nga implementasion dagiti suroten iti  security detail, pannakipartisipar dagiti dadaulo nga ehekutibo dagiti LGU, Philippine Army ken pannakapatignay kadagiti civil society groups.

Kinuna pay ni Bucayu nga ikonkonsiderana a relibuan ti intero a Tubao police station kasta met iti pannakaangay ti katulagan ti kappia kadagiti agbabalubal a partido ken kandidate babaen ti partisipasion ti sektor ti relihion ken dadduma  a maseknan a grupo.

Maipalagip nga immuna ngem daytoy, naikkat ti hepe ti polis ti Tubao gapu kadagiti nagsasaruno nga insidente ti pammaltog iti nasao a lugar.

Kabayatanna, manamnama nga iti pannakaited iti augmentation troops manipud iti special police units ken ti Armed Forces of the Philippines, umir-irut ti pannakaited iti seguridad ken iti suporta para kadagiti operasion ti kapolisan.

Manipud idi Enero agingga iti Nobiembre 2012, 6 a miembro ti partisan armed groups ti naareston ken pannakakumpiska ti agdagup iti 360 nga armas.#