BANNER NEWS: Pannakawara ti carnapping syndicate, polis-Vigan nasab-itanda iti medalia

BANTAY, Ilocos Sur – Walo a kameng ti Vigan City police a nakatulong iti pannakawara ti grupo dagiti carnappers ken pannakarekobre kadagiti motorsiklo a tinakaw dagitoy iti Laoag City ti nasab-itan iti medalia iti simple a seremonia a naangay iti Camp Elpidio Quirino ditoy idi Disiembre 3.

Mismo a ni PNP Regional Director Police Chief Supt. Orlando Mabutas ti nangisab-it iti Medalya ng Papuri kada  Vigan City Chief of Police, Police Supt. Elpidio Nartatez, Deputy COP, Police Chief Inspector Ernesto Navarro Jr., SPO4 Alexander Tapaya, SPO2 Crisanto Alon Jr., SPO2 Joseph Fieldad, PO3 Amado Somera Jr., PO1 Dennis Reoliqiuo, ken PO1 Mark Anthony Italin.

Napadayawan dagiti nadakamat a polis gapu iti naitulongda iti pannakakemmeg iti siudad ti Vigan ti maysa kadagiti kameng ti  Ryan Silvestre carnapping syndicate, grupo ti notorious nga agtaktakaw iti motorsiklo iti Laoag City, ken iti pannakarekobre dagiti tinakaw dagitoy a motorsiklo.

Kalpasan ti pannakaaresto ti mapapati a pangulo ti grupo a  ni Ryan Silvestre y Villanueva, 28, baro, residente iti Barangay XVI, Laoag City, nakikoordinar dagiti polis-Laoag iti Vigan City police ket babaen ti nagtipon a puersada, tiniliwda idi Agosto 2, 2010 ni Michael Agup, 28, naasawaan, residente iti Barangay IV, Vigan City.

Sakbayna, impudno ti maysa a kameng ti nasao a sindikato nga iti Vigan City ti drop point dagiti tinakawda a motorsiklo ket ni Agup ti para dispatsa kadagitoy.

Impalgak ni Agup dagiti nangilakuanna kadagiti natakaw a motorsiklo ket uppat kadagitoy ti narekobre dagiti polis-Vigan manipud kadagiti gimmatang a residente iti Sta. Catalina, San Vicente ken Vigan City.

Saan a narekobre dagiti dadduma pay a motorsiklo agsipud ta iti langalang ti nakaisayangkatan ti transaksion.#