BANNER NEWS: Pannakarakrak balbalay dagiti makitaltalon, saan a pinaituloy akinkukua ti daga

CABUGAO, Ilocos Sur – Uray pimmamulinawen ti puso, malunag iti sanguanan ti panagpakumbaba dagiti simmiasi a kakabsat.

Dayta ti napasamak idi napan nagpakumbaba da Felix “Irin” Sajor ken Emiliana Sajor Serrano iti kabsatda a ni Lucresio “Lucky” Sajor tapno saan nga ituloy daytoy ti pannakarakrak dagiti duapulo ket maysa a pagtaengan dagiti mannalon a residente iti Barangay Bato ditoy nga ili a pakairamanan ti balay dagiti dua a kabsat ni Lucresio.

Maysa nga aldaw sakbayna, natangken ti pagtaktakderan ni Lakay Lucresio: maipatungpal ti pannakarakrak dagiti pagtaengan dagiti katalonanna babaen ti bileg ti eviction order nga impaulog ti Department of Agrarian Reform Adjudication Board maikontra kadagiti 21 a tenants a nagipatakder iti balayda iti daga ni Lakay Lucresio. Karaman ditoy ti balay da Felix ken Emiliana Sajor, kabsat ni Lucresio.

Nanangdan payen ni Lucresio iti demolition team a pakaibilangan dagiti soldado manipud iti Cordillera Autonomous Region a mangrebba kadagiti balay a sinaklaw ti pammilin no saan nga agboluntario dagiti katalonanna a mangrakrak iti balayda.

Iti dayta nga aldaw, Oktubre 26, dua a bus ti nagluganan dagiti agrakrak ket naggianda iti Cabugao Cultural Center and Sports Complex bayat ti panagurayda iti go-signal a sumrek iti Barangay Bato tapno rakrakenda dagiti balbalay.

Ngem iti sungadan ti Barangay Bato, nangipasdek iti barikada dagiti residente a pakairamanan ni Barangay Captain Santos Aquino ken dagiti kabsat ni Lakay Lucresio tapno lapdanda ti iseserrek ti demolition team bayat ti panangipagna ti abogadoda iti pannakaalada iti temporary restraining order manipud iti korte.

Natangken met ti takder dagiti agnaed iti barangay iti panangidaulo da Irin Sajor ken ti barangay captain a lapdanda ti pannakaipatungpal ti eviction order manipud iti korte.

Iti maysa nga interbiona iti radio, kinuna ni Lakay Lucresio a saanen nga agbaliw pay ti pagtaktakderanna agsipud ta iti uneg ti innem a bulan, inurayna ti yaasideg dagiti katalonannna ken dagiti kakabsatna ngem saan nga immammingaw dagitoy iti pagtaenganna. Kinuna ti lakay a sabali a tao ti inasitgan dagiti tenants a makipatang kenkuana nga ibilangna a maysa a di panangipirpirit kenkuana nga agtagikua iti nasao a daga.

Nagramut ti problema idi saanen a nagabang dagiti katalonan ti lakay agsipud iti pammatida a nailibas  a nagatang ti daga a suksukayenda idinto a benepisarioda iti reporma ti daga ken naikkanda iti certificate of land transfer.

Segun iti maysa a tenant, kas sagudayen ti reporma ti daga, maikkanda a makitaltalon iti daga a pagtakderan ti balayda.

Ngem kinuna ni Lakay Lucresio nga adda waiver of rights a pinirmaan dagiti katalonanna iti nasao a daga.

Immun-una ngem daytoy, sinalda ken ginatang ni Lakay Lucresio ti daga manipud ken ni Miguel Florendo nga aglawa iti 25 ektaria, 11 ektaria ti kapagayan ken 14 ektaria iti forest land.

Ngem itay nabiit, nangipaulog iti pammilin ti DAR Adjudication Board a mapaalis dagiti tenants a nagpatakder iti balayda iti daga ni Lakay Lucresio.

Iti dayta nga aldaw ti Mierkoles, nakumikom ti crisis management council a binuangay ni Mayor Edgar Cobangbang nga indauluan ni Vice Mayor Danny Gasmen ken dagiti kamengna a pakairamanan ni Provincial Director Police Senior Supt. Reynante Partible ken ni ABC Federated President Teddy Sollera a nagpanunot kadagiti addang a makapagsinnurot pay ti dua a partido sakbay a maipakat ti pannakarebba dagiti pagtaengan tapno malapdan ti mapagam-amkan a dakes a mapasamak.

Bayat ti panagtulid dagiti oras, agam-ampayag ti tension kadagiti agnaed iti Barangay Bato bayat ti panagurayda iti iseserrek dagiti mangrakrak iti balayda. Nagtalinaed dagiti agnaed iti sungaban ti barangay, idinto a binarikadaanda ti pagnaan ti demolision team.

Nakasagana metten dagiti soldado ken dagiti polis a mangkita nga awan ti madangran wenno mapasamak bayat ti demolision dagiti balbalay. Nupay kasta, inyunay-unay pay ni Cabugao Chief of Police  Inspector William Nerona nga ipakatda ti maximum tolerance bayat ti demolision dagiti balbalay.

Imbaon met ti provincial government ni Bokal Ronnie Rapanut a mangtulong kadagiti maseknan a bumarangay ket nangipila daytoy iti motion to quash  ngem saan a pinatgan ti korte.

Iti daytoy a desision ti korte, indagadag ni Vice Mayor Gasmen ti ipapan da Lakay Irin Sajor ken ti kabsatna a ni Emiliana iti balay ni Lakay Lucresio tapno mapanda kapatang iti maudi a gundaway.

Kinuyog ida ni Marlon Sajor Riotoc, ti apoda, a nagturong iti balay ni Lakay Lucresio.

Ballakad ti crisis management council kadagiti dua sakbay a pimmanawda: “Inkayo dumawat iti pammakawan. Uray ania ti nagbasolan ti tunggal maysa kadakayo, saanyon a dakdakamaten iti daytoy a panagpapatangyo.”

Kasta ti naaramid. Nagpakumbaba dagiti dua a kakabsat ni Lakay Lucresio ket limmukneng ti natangken a pagtaktakderan ti manongda.

Kalpasan ti panagkikinnaawatan dagiti agkakabsat, pinatgan ni lakay Lucresio ti kiddaw dagiti katalonanna a saan a maituloy a marakrak dagiti pagtaenganda ket inikkanna ida iti makatawen a pawayway tapno isuda a mismon ti agboluntario a mangrakrak iti balayda tapno iyalisda iti sabali a disso.

Idi damo, imbaga pay ti lakay a kukuan dagiti agtaltalon iti dagana ti apitda a pagay ngem saandan a talonen pay ti dagana bayat ti makatawen a naited kadakuada a pawayway a mangiyalis iti pagtaenganda. Ngem idi agangay, imbaga ti lakay a sukayen met laeng dagiti katalonanna ti dagana tapno adda pagtaudan ti pagbiagda iti las-ud ti pawayway nga intedna kadakuada.

Nupay nabisbisinan dagiti polis, soldado, dagiti opisial ti ili ken dagiti kameng ti media a nangidanon iti radio dagiti mapaspasamak, naggawidda a nalukay ti aangsanda kalpasan nga immannugot ni Lakay Lucresio a saanen a maituloy pay ti demolision dagiti balay dagiti katalonanna.

Daytoy ti pammaneknek nga iti baet ti saan a panagkikinnaawatan dagiti agkakabsat, saan a mapekka ti kawar ti panagkakabsatda ket kinamaymaysa ti dara nga agtartaray iti uratda.#