BANNER NEWS: Patronage refund agus-usar iti koriente, ited ti ISECO iti Hulio

SANTIAGO, Ilocos Sur – Impakaammo ti general manedier ti kooperatiba ti koriente┬á a maited ti patronage refund dagiti agar-aramat iti koriente ditoy probinsia iti daytoy a bulan ti Hulio.

Kinuna ni Ilocos Sur Electric Cooperative General Manager Engr. Egdon Sabio nga iti naudi a panagmimiting dagiti board of directors, inaprobaranda ti pinal a pannakayimplementar ti patronage refund dagiti member-consumers ti kooperatiba iti daytoy a bulan.

Kinuna ni Sabio nga iti billing  para iti bulan ti Hulio, addanton kantidad a maimenos iti bayadan ti member-consumer kas katukad ti patronage refund a maited kenkuana.

Kinuna ni Sabio a mabenepisiaran amin a member-consumers nga addaan iti active account iti kooperatiba iti nasao a patronage refund.

Segun ken ni Sabio, daytoy ti sungbat ti kooperatiba iti nabayagen a clamor dagiti agar-aramat iti koriente iti probinsia a mariknada koma met a hushusto a miembroda iti kooperatiba babaen ti pannakaited kadakuada ti benepisio nga adda maisubli kadakuada a kantidad iti panangpatronaheda iti kooperatiba a maibasar iti monthly a makunsomoda iti koriente.

Iti kallabes, sangkadagadag ti partylist a COOP-NATCO ni Representative Jose Ping-ay ti panagrehistro ti ISECO iti babaen ti Cooperative Development Authority (CDA), ket mandato nga ipaayna  dagitoy a benepisio kadagiti member-consumers ti kooperatiba.

Uray iti charter ti NEA, nailanad sadiay a no adda net margin iti gibus ti tawen, maisubli kadagiti member-consumers tapno maramanan amin ti ganansia ti kooperatiba, segun ken ni Sabio.

Inlawlawag ti manadier a sabali ti patronage refund iti dibidendo ta maibasar ti naud-udi iti stock a puonan ti kooperatiba ket saan pay nga inaramid daytoy ti kooperatiba..

Kinuna ni Sabio a maibasar ti maited a patronage refund iti makumsomo ti member-consumers a koriente.

Impalgak ti menedier nga iti tawen 2011, naaddaan ti kooperatiba iti positibo a net margin ket napagtitinongan ti board ti pannakaiyalokar ti P3 milion para iti patronage refund dagiti agar-aramat iti koriente iti probinsia a maibasar ti nakunsomoda manipud iti Enero agingga iti Disiembre 2011.

Nupay kasta, inyunay-unay ti manadier a saan nga agpapada ti patronage refund dagiti agar-aramat ti koriente, no di ket dakdakkel met laeng ti maisubli kadagiti nangatngato ti konsumoda iti koriente, kas ti Philip Morris, maysa kadagiti kadakkelan ti nakunsomo a koriente iti 2011, a mapattapatta nga umawat iti patronage refund a P157,000.00.

Karaman kadagiti dakkel ti maawatna a patronage refund dagiti local government units ken ti University of Northern Philippines gapu ta dakkel ti nakunsumo dagitoy a koriente idi 2011.

Kinuna ni Sabio a pamadasan laeng ti inyalokarda a P3 milion a maisubli a kas patronage refund ta awan ti pagibasaranda a benchmark agsipud ta awan pay ti kooperatiba a nangipaay iti kastoy a benepisio kadagiti member-consumersda.

Kinunana a kitaento no nasayaat manen ti operasion ti ISECO iti sumaruno a tawen  no kabaelan ti kooperatiba ti mangted manen iti patronage refund.#