Footer

BANNER NEWS: PD iti COP-Bantay: nakumpiska a paltog, balbala, maipaamiris ballistic exam

BANTAY, Ilocos Sur – Imbilin ti provincial director iti hepe ti polis ditoy iti panangisayangkatna iti naun-uneg nga inbestigasion mainaig iti insidente ti trapiko ken panaglabsing iti RA 8294 a napasamak iti Barangay Zone 4 itay nabiit.

Imbilin ni Provincial Director Senior Supt. Eduardo Dopale, Jr., ken ni COP Police Senior Inspector Esteban Madriaga Pastor ti panangisayangkatna iti inbestigasion mainaig iti armas a nasukalan dagiti polis iti ikut ni Edgar Culanta y Novilla, 48, naasawaan, taga-Nazareno, Jaro, Leyte, ngem agdama nga agnanaed iti Barangay Bonifacio, bayat ti panagpalutpotda iti insidente ti trapiko a nakainbolbaran daytoy ken ni Ronald Villareal  y Ibarra, 47, naasawaan ken residente iti Pantay Daya, Vigan City.

Nagdinnungpar idi agarup 11:30 ti rabii iti national highway a sakup ti Barangay Zone 5 ditoy nga ili idi Disiembre 14 ti Motoposh Intense motorcycle, awanan plaka, a minaneho ni Villareal ken ti Honda Wave motorcycle, awanan plaka a minaneho ni Culanta ket naipanda iti police station ditoy para iti ad-adu pay a pannakapalutpot gapu ta agpadada nga awan ti maiparangda a  lisensia.

Bayat ti panagpalutpot dagiti polis mainaig iti aksidente, nadlawda nga alusiisen ni Culanta, ket sinukimatda ti belt bag daytoy a nakasukalanda iti 2 a granada, 11 a bala ken 20 a kapsula ti cal. 45.

Nakakumpiska pay dagiti polis iti Norinco 1911 A1 caliber 45 a nagusugos ti serial numberna ken dua a magasin ti nasao a paltog a napno iti bala.

Awan ti naidatag ni Culanta a dokumento kadagiti nakumpiska a paltog ken magasin.

Imbilin ni Dopale ti pannakaidatag dagiti ebidensia a narekobre iti ikut ti suspek para iti ballistic ken cross matching iti PNP crime lab no naaramat dagitoy kadagiti insidente ti pammaltog a napasamak iti Bantay iti kallabes.

Adda sumagmamano a pammapatay ditoy nga ili a pakairamanan a nakagudasan ti maysa a polis ken fireman a nakaaramatan iti Cal. 45.#