Footer

BANNER NEWS: Peace covenant pinirmaan dagiti kandidato

VIGAN CITY – Impatalged dagiti politiko ditoy probinsia ti naurnos, nadalus,  ken natalna nga eleksion kabayatan ti basingkawel ti politika babaen ti panagpirmada iti katulagan ti kappia kas paset ti spiritual conference a naangay idi Marso 23 iti Katedral ni San Pablo ditoy.

Iti panagpirmada iti Covenant for Peace and Cooperation, inkari dagiti politiko ti “panangsurotda iti nakristianuan a tagimpen ti ayat, hustisia ken talna iti publiko ken personal a biagda, partikular iti daytoy a panagpipili, kas ipaneknek ti panangsurotda kadagiti amin a linteg ti pagilian ken pananglisida kadagiti immoral nga aramid, illegal a taktika ti kampania wenno eleksion, kas iti panagaramat iti aniaman a porma ti nainsuitikan nga aramid.”

Impatalged pay dagiti nagpirma  ti “naurnos, nadalus, addaan kaipapanan ken natalna nga eleksion tapno agturay ti hustisia ken wayawaya kabayatan ti basingkawel ti politika saan laeng iti lokalidadda no di pay iti sibubukel a pagilian iti amin a panawen”.

Indauluan da Deputy National Security Adviser Luis “Chavit” Singson ken Gov. Deogracias Victor Savellano, kandidato para gobernador ken bise gobernador dagiti nagpirma iti peace covenant.

Ngem sumagmamano a kandidato a pakairamanan ni PMP gubernatorial candidate Efren Rafanan, Sr. ti saan a nagparang iti nasao nga spiritual conference a naangay babaen ti inisiatibo ti Philippine National Police, Philippine Army, Archdiocese ti  Nueva Segovia ken Commission on Elections. Nupay kasta, adda a timmabuno ti katiket ni Rafanan a ni vice gubernatorial candidate Romeo Hidalgo.

Saan met a nakadar-ay iti spiritual conference da Cong. Ronald Singson ken ti kasangona a ni Bertrand Baterina.

Saan met a nagparang dagiti agkabsat a Tito ken Mark Purisima  a kandidato para mayor ti San Ildefonso; ni laeng dati a Cong. Mariano Tajon nga agtaray para mayor iti Sto. Domingo ken ni Vice Mayor Antonio Que ti adda; saan a nakadar-ay dagiti  kandidato iti Magsingal; ken da laeng Vice Mayor Edgar Yabes, kandidato para mayor iti Sinait ken ti bisena ti adda.

Iti siudad ti Candon, ni laeng Mayor Allen Singson ti dimmar-ay. Saan a nakadar-ay ni Eric Own Singson a kabsatna ket ni laeng Edwin Antolin a kasango daytoy  iti kinadiputado iti maikadua a distrito ti adda.

Nupay awan ti kasango da Vigan City Mayor Eva Marie S. Medina ken Ryan Singson a para bise mayor, indauluanda dagiti amin a konsehal a dimmar-ay iti spiritual conference. Adda met a presente da mayoralty candidates Rex Morales ken Dr. Chita Suero, asawa ni Dr. Diocaesar Suero nga  agpada a kandidato para mayor iti Cabugao.

Iti sermon ni Nueva Segovia Archbishop Ernesto Salgado, kinunana a bunga ti kinalinteg ti kappia isu a kasapulan ti panagiinnayat ti tunggal maysa tapno awan ti riri.

“Aramidentayo koma daytoy saan a para iti bagbagitayo no di para iti sapasap a tao nangruna iti probinsiatayo,” indawat ti arsobispo.

Dinawat met ni Msgr. William Antonio, Vicar General ti Nueva Segovia nga agkaykaysa koma a tuladen dagiti agngayangay dagiti inaramid ni Jesukristo babaen ti panangiyuna kadagiti awanan.

“Saantayo a mailibak a maliplipatan dagiti napanglaw gapu ta kukua dagiti addaan ti political power. Empowerment is in you. Laglagipenyo a ti turay ket kukua ti Apo. Impabulodna laeng kadatayo,” impalagip ni Msgr. Antonio.

Karaman kadagiti nangsaksi iti peace covenant da PNP Ilocos Sur Provincial Director P/SSupt. Eduardo Dopale, 50th IB Commanding Officer LTC. Rogelio Migote ken COMELEC Provincial Supervisor Atty. Marino Salas.#