BANNER NEWS: Peke a propesional a maestra, nasentensiaan a mabalud

BAGUIO CITY – Maysa a peke a professional teacher iti Lingayen, Pangasinan ti nasentensiaan itay nabiit a mabalud gapu iti panangpekena iti lisensiana.

Inwaragawag ni Professional Regulation Commission (PRC) Chairperson Teresita R. Manzala a sinentensiaan ni Lingayen Municipal Trial Court Judge Mervin S. Samadan ni Mary Grace Bautista-Fernandez a mabalud manipud iti uppat a bulan ken maysa nga aldaw agingga iti 2 a tawen, 4 a bulan ken 1 aldaw ken agbayad pay iti multa a P5,000.00 gapu iti panangpekena iti lisensiana kas propesional a maestra.

Iti desision ni Samadan a naipaulog idi Enero 17, 2012, napudasdasan ni Mary Grace Bautista-Fernandez a nagbasol iti falcification of public document.

Insaklang ti Pangasinan Provincial Prosecutor’s Office ni Fernandez babaen ti complaint ti PRC gapu iti panagusarna iti napalso a secondary professional teacher license.

Kinuna ni Manzala nga impakita ti desision ti korte ti kinainget ti PRC a mangipatungpal iti mandatona a mangsalaknib iti pagimbagan ti publiko babaen ti epektibo a regulasion iti professional practice.

Binallaagan ni Manzala dagiti agngayangay a propesional a saanda a makitransaksion kadagiti fixers ken pumasada iti licensure examinations babaen ti lehitimo a wagas.

Nagapela pay ni Manzala iti publiko nga agbalinda a bihilante, kasta met iti panangberipika dagiti employers kadagiti propesional a dokumento. Innayon ni Manzala a nalakan a beripikaren ti publiko dagiti propesional a kredensial iti www.prc.gov.ph.

Impalgak ti PRC chairperson a ti nasao a desision ti korte ti umuna a conviction kadagiti 18 a sabali pay a kaso nga im-imbestigaren ti PRC Baguio Regional Office wenno impilana iti nadumaduma a korte.

Imbilin ni Manzala iti PRC Baguio Office ti ad-adda pay a panangingetna kadagiti anti-fixing programs babaen ti kooperasionna kadagiti ahensia ti rehion ken local government units. Imbilinna pay ti naan-anayen nga implementasion ti Online Application System tapno mapadaras ti pannakaproseso dagiti professional documents ken mapabassit, no saan a mapukaw, dagiti aramid a fixing.

Dinayaw ni Manzala ti PRC Baguio Regional Office, National Bureau of Investigation – CAR ken Pangasinan Provincial Prosecutor’s Office gapu iti daytoy a desision ti korte a kunana a maysa a balligi para iti pagimbagan ti publiko.#