BANNER NEWS: Plantasion ti marihuana iti Sugpon, rinaut dagiti polis

SUGPON, Ilocos Sur – Rinaut dagiti nagtitipon nga elemento ti polis ti maysa a plantasion ti marihuana iti maysa a nasulinek a barangay ditoy nga ili idi Disiembre 21 ket pinag-ot ken pinuoranda dagiti rinibribu a kapuon a mapattapatta nga agpateg iti nasurok P6 milion.

Segun iti report a nakalap ti Tawid News Magasin, nagtitipon dagiti elemento ti Provincial Anti-Illegal Drugs Special Operation Task Group (PAIDSOTG), Ilocos Sur Police Public Safety Company (ISPPSC), miembro ti Provincial Intel Branch (PIB) nga indauluan ni Police Chief Inspector Sosimo Raquepo Racho, miembro ti Regional Intelligence Division (RID, PRO 1), miembro ti Philippine Drug Enforcement Agency 1 (PDEA RO1) a nakabase iti San Fernando City, La Union nga indauluan ni IO3 Darnel L. Bacate ken ti Alilem Police Station nga impanguluan ni Police Inspector Eduardo Gamueda Mutong, a nangisayangkat iti marijuana eradication idi agarup 2:45 ti bigat ti Disiembre 21 iti Sitio Nagawa, Barangay Caoayan, ditoy nga ili, a masarakan iti nagbeddengan iti Sitio Giwan, Barangay Bilig, Kayapa, Bakun, Benguet.

Nagresulta ti nasao nga operasion iti pannakapag-ot ken pannakapuor ti sumurok-kumurang a 30,000 a fully grown a mula ti marihuana, pannakasamsam ti sumurok kumurang 2,500 a sanga ti marihuana ken 125g a bukel daytoy maiparparit a mula a mapattapatta nga agbalor amin iti P6,503,125.00.

Maymaysa a lugar ti nasao a plantasion nga aglawa iti 5,000 metro kuadrado.

Nangibaba dagiti rimmaut iti sumagmamano laeng kabungkos a pinuon ti marihuana ket naipan dagitoy iti Ilocos Sur Provincial Police Office kas pammaneknek iti panagballigi ti operasion.

Sakbay daytoy, tallo nga upland towns ti dinakamat ni OIC Provincial Director Police Senior Supt. Noel Baguitan Amoyen a zero-accomplishment mainaig iti kampania ti provincial police office maikontra iti maiparparit a droga.

Segun ken ni Amoyen, awan ti naireport nga operasion ti municipal police station ti Cervantes, Alilem ken Sugpon mainaig iti kampania ti droga iti bulan ti Nobiembre idinto a daytoy a bulan ti kapades koma dagiti operasion maikontra iti daytoy.

Imbilin ti provincial director kadagiti hepe ti polis iti panangipakaammoda iti provincial police office no adda dagiti matartaraken a plantasion ti marihuana iti sakupda ken iti pannakikoordinarda iti PDEA ken dadduma a maseknan nga ahensia tapno maiyussuatan iti addang wenno operasion para iti pannakapugipog dagitoy.#