BANNER NEWS: Police investigators ti Ilocos Sur, adu ti awanan pormal training iti investigative work

BANTAY, Ilocos Sur – Sumagmamano a police investigators dagiti municipal police stations ditoy probinsia ti awanan iti maiyannatup a training iti panagimbestiga ket masapul a mapanda agsanay tapno maannongda a nasayaat ti pagannonganda.

Segun iti memorandum a naggapu iti Police Regional Office 1 iti San Fernando City a naiturong iti Provincial Police Office ti Ilocos Sur, kapaliiwan ti nangatngato nga opisina a sumagmamano kadagiti inbestigador ti saan pay a naipababaen iti maiyannatup nga investigation training ket kasapulan a mapanda agsanay iti Criminal Investigation Course, 4th batch 2011 a tentatibo a maluktan inton Disiembre 15.

Kanaig daytoy, imbilin ni OIC Provincial Director Police Senior Supt. Noel Baguitan Amoyen kadagiti amin a chief of police ti panangipatulodda kadagiti police investigators iti babaenda nga awanan pormal a training iti panagimbestiga tapno mairamanda kadagiti agadal iti CIC.

Naammuan ti Tawid News a sumagmamano kadagiti nairekomenda a mapan agadal iti CIC ti nagkiddaw iti pannakaitantan ti panagtrainingda ngem iti sabali pay a memo manipud iti PRO1, naibilin kadagiti COPs ti panangallukoyda kadagitoy a mangituloy iti panagadalda ken ti panangisubmiteda kadagiti kasapulan para iti nasao a training tapno malapdan ti maipakat nga administrative sanction maikontra kadakuada.

Naipalaon pay iti memo a maysa a panaglabsing ti kaawan ti maiyannatup a training dagiti natudingan a police investigators iti direktiba ti nangatngato nga opisina, kas naipalanad iti maikatlo a panggep ti action plan ti PNP chief a “pannakaidur-as ken espesialisasion ti kabaelan” dagiti polis nga inbestigador.

Naibilin pay kadagiti COP a no saan nga agtungpal dagiti inrekomendada nga ag-training iti CIC, marelibo dagitoy iti investigation unit a nakaikappenganda ket maipanda iti sabali a seksion.

Kabayatanna, naipalaon iti report ni OIC provincial director iti Provincial Peace and Order Council idi Disiembre 6 a 643 ti kadagupan ti nailistada a kaso manipud idi Enero agingga iti Nobiembre daytoy a tawen, nababbaba iti 249 no ikumpara iti nailista a 892 a kaso itay napan a tawen.

Inreport pay ni Amoyen nga adda nairekord a 460  nga index crimes iti daytoy a tawen, basbassit nga amang ngem ti nairekord a 627 idi 2010 idinto a 183 ti nairekord a non index crimes iti 2011 idinto a 265 idi napan a tawen.

Kas maibatay iti report ni Amoyen, bimmaba ti crime rate iti kada bulan ta 8.8 laeng ita a tawen idinto a 12.2 iti kastoy met a tiempo idi 2010.

Segun pay iti report ti ISPPO, ngimmato ti crime solution efficiency ta dimmanon iti 59% ita a tawen manipud iti 43.1% idi 2010.

Segun iti maysa a police officer, manamnama nga iti pannakaibaon dagiti police investigators nga awanan pormal a training iti investigative work a mapan agbasa iti Criminal Investigation Course, ngumatngatonto pay ti solution efficiency dagiti maisayangkat a krimen iti Ilocos Sur.#