BANNER NEWS: Polis, addan pamalpalatpatanda nagisayangkat pawnshop robbery

VIGAN CITY – Addan lead a sursuroten dagiti inbestigador ditoy siudad mainaig iti panagtakaw iti maysa a pawnshop ditoy siudad a mapapati a naisayangkat idi rabii ti Nobiembre 1.

Segun iti pakpakauna nga impormasion, mapapati a nagkasera iti nakurang a makabulan dagiti suspek iti maysa a balay iti Barangay Boquig, Bantay, Ilocos Sur ket agruprupa dagitoy a taga-bambantay.

Inyam-ammo kano dagiti suspek ti bagida a kas inhiniero ken arkitekto ket nagupada iti nakurang a makabulan iti nasao a balay iti nadakamat a barangay.

Nagkasera dagiti suspek iti balay manipud iti Oktubre 5 agingga iti Nobiembre 1.

Nupay kasta, nagkedked ni Police Chief Inspector Ernesto Navarro, OIC chief of police ditoy siudad, a mangipalgak pay iti ad-adu pay nga impormasion tapno saan a maunaan ti panagimbestigada.

Mapapati nga iti rabii ti iruruar dagiti suspek ket imbagada iti traysikel a mangitultulod kadakuada nga adda kontratada iti trabaho iti Vigan City.

Saan metten a nagsubli pay dagiti suspek iti kaserada kalpasan ti panagtakaw iti Tambunting Pawnshop idi Nobiembre 1.

Mapattapatta a naisayangkat ti panagtakaw iti Tambunting Pawnshop a masarakan iti Quezon Avenue, Barangay I, ditoy siudad idi rabii ti Nobiembre 1 a nakatuon ti imatang dagiti polis iti pannakatagiben ti urnos ken talna iti panagdudupudop dagiti tattao iti sementario tapno selebraranda ti Piesta dagiti Natay.

Mapattapatta nga agdagup iti aganay P4.5 milion ti kuarta ken alahas a kinurimes dagiti mannanakaw iti uneg ti vault.

Mapapati a  nagna dagiti mannanakaw iti kanal a naipaurnos iti bangketa ti Quezon Avenue agingga iti sanguanan ti pawnshop sada nagabut iti dalanda a simrek iti uneg.

Idi addan dagiti mannanakaw iti uneg, pinorsarda a linuktan ti vault babaen ti panangdadaelda kadagiti kandado babaen ti steel saw.

Mapapati a naglibas dagiti mannanakaw babaen met laeng ti simrekanda nga abut ken iti kanal.

Segun ken ni Vilma Gascon, manager ti pawnshop, sumagmamano a ganggannaet a rupa ti nakitana nga immar-arubayan iti pawnshop sakbay ti pannakaserrekna.

Ngem sumagmamano a nagsalda iti alahasda iti pawnshop ti nangbabalaw iti mangimatmaton agsipud ta awan man laeng ti guardia ti pawnshop ken awan ti alarm system ken kamera idinto a requirement dagitoy kadagiti business establishments iti siudad.#