BANNER NEWS: Polis, natiliwan iti droga, paltog iti entrapment operation

BANTAY, Ilocos Sur – Nanabtuog ti maysa a polis iti ima dagiti padana met laeng a polis a nangisayangkat iti entrapment operation bayat ti mapapati a panagideliberna iti droga iti Bantay Arcade idi malem ti Hulio 26.

Iti pannakaisurat daytoy, nakapupok ni PO1 Jefferson Estilloso Javier, miembro iti Bantay PNP ken residente iti Barangay Paing, iti pagbaludan iti Provincial Police Office ditoy met laeng nga ili bayat nga isagsagana ti Bantay police ti kaso maikontra kenkuana.

Segun iti report manipud iti polis ditoy, maysa nga entrapment operation ti impakat ti nagtitipon a police elements a pakaibilangan ti PDEA, Provincial Anti-Illegal Drugs Special Operations Task Group (PAIDSOTG), ken ti Bantay police station iti panangidaulo ni Police Senior Inspector Andrew Rabang maikontra ken ni Javier a nagresulta iti pannakasamsam iti ikutna dagiti mapapati a droga ken paltog.

Nakakumpiska dagiti polis iti maysa a maris-dapo a bag a naglaon iti 4 a pedaso ti aluminum foil a mapapati nga addaan residue ti shabu, maysa a plastic sachet a nagkarga iti napagango a bulong ti marihuana, 2 a plastic sachet a nagkarga iti mapapati a shabu, ken maysa a metal box a mapapati a nagkarga iti  marihuana.

Nakasamsam pay dagiti polis iti ikut ni Javier iti maysa a cal 38 revolver homemade paltik a saan a lisensiado.

Segun iti report, inwayat dagiti polis ti entrapment operation idi nangarkila ni Javier iti traysikel sa nagpaitulod iti Bantay Arcade para iti mapapati a pannakaideliber dagiti nasao a droga.

Kabayatanna, positibo ti resulta ti panagsukisok nga insayangkat dagiti nagtitipon a bunggoy dagiti polis iti balay ti maysa a masuspetsa nga aglaklako iti droga iti Barangay III ti Siudad ti Vigan idi bigat ti Hulio 25.

Kinuna ni Police Supt. Maximo Taclas, OIC iti Vigan City Police Station, nangidaulo iti search operation a pakaibilangan ti PDEA ISSET, Ilocos Sur Provincial Intelligence Branch (ISPIB), ken ISPAIDSOTG, nakakumpiskada iti paltog, balbala, drug paraphernalia ken dadduma pay a ramit a maar-aramat iti panagaramid iti droga iti balay ni Romeo Ang Liquete, a.k.a. Mengat, 43, naasawaan ken residente iti Barangay III, ditoy siudad.

Sinukisok dagiti nagtitipon nga elemento nga indauluan ni Taclas ti balay ni Liquete babaen ti bileg ti search warrant nga inyisio ni Judge Francisco A. Ante, Jr. ti Municipal Trial Court in Cities (MTCC), Vigan City.

Sinaksian dagiti barangay officials, pannakabagi ti Department of Justice ken kameng ti media ti nasao a panagsukisok dagiti polis a nakakumpiskaan ti tallo a heat sealed small plastic sachet nga addaan iti mapapati a shabu residue, 2 pedaso a nakuppil nga aluminum foil a mapapati nga addaan iti residue ti droga, maysa a pedaso ti improvised glass totter nga addaan iti mapapati a shabu residue,  2  digital weighing scales, 2 boxes aluminum foils, 2  lighter, 3 getteng, 1 improvised needle, 2 transparent plastic pipes nga addaan mapapati a shabu residue, 2 improvised plastic pipes nga addaan mapapati a  shabu residue, 2 bundles ti small transparent plastic sachet  nga agdagup amin iti 182 a maaramat para iti  repacking, ken maysa a nangisit a box ti CDR King.

Nakasamsam pay dagiti nagsukisok iti maysa a 1911 A1 Norinco cal .45 pistol nga addaan iti serial number BA137542 (blue finish), 1 box a naglaon iti 50 a live ammunitions para iti cal. 45, 1 black box a naglaon iti  32  live ammunitions, 6 kapsula ti cal .45, 1 transparent box a naglaon iti 22 live ammunitions para cal .22, 1 transparent box a naglaon iti 100 live ammunitions para cal. 22 ken 2) magasin para cal .45.

Iti pannakaisurat daytoy, maisagsaganan ti maipila a kaso maikontra ken ni Liquete.#