Footer

BANNER NEWS: Politika iti Ilocos Sur: Singson vs. Zaragoza

VIGAN CITY – Manamnama ti nainget a salisal iti politika iti Ilocos Sur kalpasan a nagipila iti kandidatura dagiti kameng dagiti dua a prominente a pamilia dagiti politiko para iti masungad nga eleksion – ti Pamilia Singson ti Bileg Party, ken Pamilia Zaragoza ti Partido Demokratiko ng Pilipinas – Lakas ng Bayan (PDP – Laban).

Daytoy ti naamuan iti opisina ti Commission on Elections kalpasan ti deadline ti panagipila iti certificate of candidacy idi malem ti Oktobre 17, 2018 dagiti agkandidato para iti May 13, 2019 National / Local Elections.

Segseggaan dagiti umili ti napinget a risiris iti politika iti Ilocos Sur ta agsalisal a para gobernador da incumbent Gov. Ryan Luis Verzosa Singson, ken Narvacan Mayor Zuriel Singson Zaragoza. Agbalubal met a para bise gobernador da incumbent Vice Governor Jeremias “Jerry” Crisologo Singson ken sigud a 2nd District Sangguniang Panglalawigan Member Atty. Anicka Singson Zaragoza.

Sadiay ili ti Narvacan, Ilocos Sur, agbalubal a para mayor da sigud a Mayor ken National Tobacco Administration Administrator Edgardo Zaragoza ti PDP Laban, ken sigud a gobernador ken incumbent Narvacan Sangguniang Bayan Member Luis “Chavit” Crisologo Singson ti Bileg Party.

Ni Gov. Ryan Luis Singson ket anak ni Narvacan SBM Chavit Singson a kabsat ni Vice Gov. Jerry Singson a pailayon a bise gobernador. Da Zuriel ken Anicka Zaragosa ket anak ni Ex Mayor Edgardo Zaragoza.

Kaasmang ni Edgardo Zaragoza a para bise mayor ti anakna a ni incumbent Mayor Fayinna Pilar Zaragoza Delgado. Kadua met ni Chavit Singson a para bise mayor ti sigud a bise gobernador ken kaasmangna idi 1971 ni Human Rights Lawyer Atty. Pablito Sanidad Sr., ama ni 2nd District SPM Pablito Sanidad Jr.

Manipud 1988, nagbalin ti Narvacan a kontrolado ti Pamilia Zaragoza. Immuna a nadurokan nga Officer In Charge ni Edgardo Zaragoza kalpasan ti 1986 EDSA People Revolution. Idi 2016 Local Elections, nangabak a kameng ti Sangguniang Bayan ti Narvacan ni Chavit Singson, ken napili a National President ti Philippine Councilors League.

Agsasalisal met a para kongresista iti Umuna a Distrito da incumbent Congressman Deogracias Victor “DV” Savellano ti Bileg Party, ken dagiti tallo nga independiente a kandidato a da Ex Cong. Ronald Verzosa Singson, Thaddeus Soller, ken Benito Aguilar. Agsalisal met para kongresista iti Maikadua a Distrito da incumbent Cong. Eric Dario Singson ti Bileg Party ken Arturo Chua ti PDP – Laban.

Agpailayon met a para SPM iti Umuna a Distrito iti salinong ti Bileg Party dagiti incumbent board members a da Ma. Mikaela Karita Mendoza, Constante Oandasan, Christopher Baterina, Ronnie Rapanut ken Efren Rafanan. Pailayon met para iti SP ti Maikadua a Distrito iti Bileg Party da SPM Mildred Elaydo, Virginia Cordero Pe Benito, Pablito Sanidad Jr., ken Jaime Singson; katiketda ti agdadamo a ni Benjamin Maggay.

Kandidato met para SPM iti Umuna a Distrito iti PDP Laban da Miraxaela Balallo, Roger Lampitoc ken Bernard Vicente. Papili met a para SPM iti Maikadua a Distrito iti PDP Laban da Anna Liza Europa Morales, Mediatrix Balicdan, Waldimar Ping-ay ken Eduardo Hermosura. Independent candidate met a para SPM ti Umuna a Distrito ni Gerardo Lahoz.

Nakaturong ti atension dagiti adu nga umili iti Ilocos Sur ti panagbabalubal dagiti prominente a pamilia nga agngayangay para gobernador ken bise gobernador, ken mayor iti Narvacan, ken kina-kongresista iti Umuna a Distrito. Iti pannakiuman kadagiti adu nga umili, mailiwanda nga adda pagpilianda kadagiti kandidato tapno maisaad dagiti kapkapnakenda a mangidaulo ti lokal a gobierno.  Ur-urayen dagiti umili no addanto pay pagbaliwan dagiti agkandidato kalpasan ti deadline ti “substitution of candidates” ken “withdrawal of candidacy.”

Agkakapamilia ken agkakabagian dagiti prominente a politiko a Singson iti Ilocos Sur. Agkayong met da Cong. Eric Singson ken Ex Mayor Edgardo Zaragoza ta kabsatna ti asawa ti agsubli a mayor iti Narvacan, ken kaanakanna dagiti sumango a gobernador ken bise gobernador. Agkatugangan met da Gov. Ryan Singson ken Cong. DV Savellano nga ama ti First Lady ti Ilocos Sur. Agkabsat met ti agdama a gobernador ken ni Ex Cong. Ronald Singson a kabalubal ni incumbent Cong. DV Savellano.

Kabayatan ti pannakasursurat daytoy a damag, madama pay laeng ti panagawat iti listaan dagiti amin a kandidato kadagiti amin nga ili ken siudad ti Ilocos Sur. Addan dagiti naireport nga awan kabalubal dagiti kandidato. Kalaksidan iti Narvacan, manamnama a nainget ti salisal iti eleksion iti ili ti Cabugao, Santa Catalina, Tagudin ken dadduma pay nga ili nangruna dagiti upland municipalities.

Inrakuraken kadagiti kameng ti media ni Ilocos Sur Police Provincial Office Provincial Director Cliff Bayacsan ti panangmitingna kadagiti chief of police iti probinsia tapno amirisenda dagiti ili ken siudad a nainget ti salisal iti politika a mabalin a maideklarar nga under priority concern wenno hot spot tapno masaluadan ti nakappia ken nadalus nga eleksion iti Ilocos Sur inton 2019. (Eden Alviar)

,