BANNER NEWS: Protektor iti shabu lab, nasentensiaan iti tungpal biag

BAUANG, La Union – Sinentensiaan ti regional trial court judge ditoy ti maysa a nangato nga opisial ti PNP kalpasan a napaneknekan a protektor iti maysa a laboratorio ti droga a rinaut dagiti polis idi 2008.

Sinentensiaan ni Judge Ferdinand Fe ti RTC Branch 67 ditoy nga ili iti tungpal biag a pannakaibalud ni Police Supt. Dionisio Borromeo gapu iti mapapati a panangprotektarna iti shabu laboratory sadiay Barangay Bimmotobot, ditoy nga ili.

Ni Borromeo ti hepe ti polis ti Dagupan City idi naraut ti shabu lab idi 2008 a nakakumpiskaanda kadagiti ramramit ken kemikal iti panagaramid iti droga a mapattapatta nga agbalor iti P27 milion.

Malaksid iti sentensiana, imbilin pay ti korte ti panagmulta ni Borromeo, agdama a deputy provincial director ti Cavite Police Provincial Office,  iti P10 milion.

Nasentensiaan met a mabalud ni SPO1 Joey Abang,  co-acused ni Borromeo, iti minimum a 12 a tawen ken maysa nga aldaw agingga iti 20 a tawen ken panagmultana iti P500,000.00.

Naaresto ken naikustodia ni Abang iti Bureau of Jail Management and Penology, San Fernando City, La Union.

Kabayatanna, mapapati a dimmatag ni Borromeo ken ni  Provincial Police Director Senior Supt. Alexander Rafael para iti pannakaikustodiana uray awan pay ti naawatna a warrant of arrest.

Adda 15 nga aldaw nga agapela ni Borromeo.

Maipalagip nga idi Hulio 9, 2008, rinaut dagiti nagtitipon a bunggoy dagiti polis ti shabu lab a naipasdek iti nasulinek a lugar ti Barangay Upper Bimmotobot, Naguilian, La Union a nakakumpiskaanda kadagiti ramramit ken kemikal para iti panagaramid iti droga.

Nasukalan ti nasao a shabu lab gapu iti nakaro nga angot dagiti kemikal nga agtaud ditoy.

Mapattapatta a makapartuat dagiti nakumpiska a ramramit ken kemikal iti saan a nakurkurang ngem 180,000 kilos a shabu.

Imbilang ti kapolisan ti rinautda a shabu lab a kadakkelan iti intero a pagilian.

Idi damo, agdagup amin  iti 52 a polis ken opisial ti naikalam-it iti kaso ket nareliboda amin.

Nupay kasta, nawaswas ti kaso maikontra kadakuada gapu iti kaawan iti umdas nga ebidensia ket da laeng Borromeo ken ni Abang ti nabati a naakusaran.

Innaganan ni Dante Palaganas, caretaker ti shabu lab ni Borromeo a kas protektor. Nupay kasta, pinaglibakan ni Borromeo ti akusasion maikontra kenkuana.#