BANNER NEWS: Scholars ti gobierno probinsial, agpeggad a di maawat iti UNP

VIGAN CITY – Agpeggad a saan a makatuloy dagiti iskolars a pagad-adalen ti gobierno probinsial iti maysa nga unibersidad ditoy no saanna a malitupan dagiti utangna iti nasao a pagadalan.

Iti panagparangna iti sangguniang panlalawigan iti sessionna itay Abril 30, impalgak ni Dr. Gilbert Arce, director ti student affairs ti University of Northern Philippines, a maysa a resolusion ti inaprobaran ti scholarship committee ti UNP a mangsuspenso iti Ilocos Sur Educational Assistance and Scholarship Program ti gobierno probinsial mangrugi iti school year 2008-2009 agingga iti saan a mabayadan ti gobierno probinsial ti utangna iti panagbasa dagiti iskolar daytoy iti nasao a pagadalan.

Agdagup iti P6.1 milion ti mapapati nga utang ti gobierno probinsial mainaig dagiti pagad-adalenna nga iskolars iti UNP.

Segun ken ni Arce, pinirmaanen ken inaprobaran ni Dr. Lauro Tacbas, presidente ti UNP,  ti resolusion ti scholarship committee a nakailanadan ti rekomendasionda a suspension.

Kanaig daytoy, kinuna ni Vice Governor Jerry Singson a respetarenna ti desision ti UNP a panangsuspensona iti scholarship program ti gobierno probinsial.

“Respetarenmi ti aniaman nga addangda ta (isuda) adda karbenganda a mangaramid iti daydiay…” kinuna ni Singson bayat ti programana a Kakibin ti Balligi iti DWRS, idinto nga innayonna nga “uray ania a banag, adda makuna a reglamento… a no adda problema, pagpapatanganda ket no ania ti rummuar a kapanunotan, isu ti adda nga irekomendada and then finally, ti presidente a mangaprobar.”

Kinuna ni Singson a “nasayaat met ta maysa dayta a ruangan wenno pagsarmingan.. ta no kasta, maipapati man ti panaggaraw latta ti gobierno probinsial.”

Kinunana pay ni Arce iti sanguanan dagiti kameng ti sangguniang panlalawigan a masapul ti naan-anay a pannakarebio ti Ordinance No. 5 agsipud ta adda dagiti napaliiwda a saan a masursurot.

Kinuna ni Arce a nasdaaw ta ti ammona, ti komite ti edukasion ti mangmanmanehar iti scholarship program ti gobierno probinsial kas sagudayen ti ordinansa ngem naduktalanna nga adda sabali a body a nabuangay a mangimanehar iti programa.

Innayonna pay a kas maibatay iti ordinansa, 80 laeng ti scholars ti gobierno probinsial tunggal tawen ngem nasurok metten a 400  ti pagbasbasaen ti gobierno probinsial.

Impeksa ni Singson ti pammaliiwna nga “awan ti ganganaygayan” ni committee on education chair Bokal Ronie Rapanut ta “kasla naputed metten ti pannakaibiang nga enteremente ti hunta probinsial” ta adda nabuangay iti opisina ti gobernador a body a mangimanehar iti scholarship program ti gobierno probinsial.

Kinuna ni Singson a saan koman a mapadakkel ti problema ket imbes a pormal a mapaayaban ni Dr. Tacbas, “mabalin met a pagpapatanganda tapno kitaenda no ania ti maaramid tapno masolbar ken maikkat ti kontrobersia tapno agtultuloy latta ti scholarship program ti gobierno probinsial.

Kinuna ni Singson nga agboluntario a mangurnos iti “saan a panagkikinnaawatan” ti UNP ken ti opisina ti gobernador mainaig iti problema ti utang ti gobierno probinsial iti nasao a pagadalan mainaig kadagiti iskolar a pagbasbasaenna  iti UNP.#