BANNER NEWS: Security escort ti mayor, natiliwan nga agikut iti paltog

CAMP ELPIDIO QUIRINO, BANTAY, Ilocos Sur – Dua a lalaki a pakaibilangan ti mapapati a security escort ti maysa a mayor ti nasukalan nga agikut iti paltog iti baet a nayimplementaren ti election gun ban mainaig iti maangay a barangay ken SK elections inton Oktubre 25.

Nasukainan dagiti polis ni Felix Habungan y Olano, 39, naasawaan, residente iti Barangay Sabuanan, Sta. Lucia, Ilocos Sur nga adda paltogna a naikabil iti belt bagna bayat a gumatgatang iti maysa a tienda iti sanguanan ti police station iti Candon City iti agarup alas 4:00 ti malem ti Oktubre 8.

Nagsuspetsa ni Police Supt. Marlo Castillo, OIC ti Candon police, idi makitana ti pistol belt bag ni Habungan ket sinaludsodna no militar wenno polis daytoy. Idi imbaga ni Habungan a saan, inawis ni Castillo daytoy iti uneg ti estasion ket idi luktanda ti bag, nakitada ti maysa a CZ 75 Compact caliber 9 mm pistol nga addaan iti magasin a naglaon iti 12 a bala.

Awan ti naipakita ni Habungan a dokumento para iti nasao a paltog. Inrasonna ketdi a security escort ni Sta. Lucia Mayor Estrella Hernaez.

Iti pannakaisurat daytoy, di pay nakumpirma no security escort ni Hernaez ni Habungan.

Kabayatanna, idiay Magsingal, Ilocos Sur, pinasardeng dagiti polis ti maysa a Partas bus idi lumabas daytoy iti impasdekda a checkpoint kalpasan a nakaawatda iti report a maysa a lalaki nga addaan paltog a nainbolbar iti riribuk iti Barangay Bacsil ti nakalugan iti nasao a bus.

Idi immuli dagiti polis iti lugan, nasiputanda ti maysa a lalaki a nakatugaw iti likud a mangipakni iti maysa a banag iti sikigan ti tugawna.  Dinagdagus a kinumpiska dagiti polis ti paltog a maysa a cal 9mm, model 213 Norinco nga addaan magasin a naglaon iti 7 a bala.

Nainaganan ti suspek a ni Marvin Piano Castillo, 20, baro, residente iti Barangay Guimod Sur, San Juan, Ilocos Sur.

Naipilan ti kaso a panagsalungasing iti RA 8294 kanaigan iti Comelec Resolution No. 8714 ken Sec. 5 ti Article 2 ti RA 9165 maikontra kada Habungan ken Piano.

Naipasdek dagiti checkpoints kadagiti nadumaduma nga ili iti probinsia kas panangipatungpal ti kapolisan iti election gun ban, kas sinaguday ti Resolution No. 8714 ti Comelec.#

Enhanced by Zemanta