BANNER NEWS: Seguridad ti masungad nga eleksion, bilin ti kabarbaro a PNP regional director iti kapolisan

CAMP BGEN OSCAR M FLORENDO – Imbilin ti kabarbaro a regional director ditoy kadagiti komander ti Regional Special Operations Task Groups (RSOTGs), amin a police units ken opisina iti babaen ti komandansiana ti panangipaayda amin a kabaelanda tapno maseguro ti seguridad ken patas nga eleksion.

Imbilian pay ni Police Chief Superintendent Ricardo C. Marquez  ti pannakapugipog dagiti partisan armed groups, pannakadagup dagiti agraira nga armas, ken pannakaaresto dagiti most wanted persons ken kriminal a grupo iti rehion.

“Our role is to serve and protect, and in this coming elections we need to maximize police visibility, we will also secure all voters for them to elect their preferred candidates without fear, unforced and unthreatened.  I want police presence where it matters most, the patrol mobile must be visible in the roads and not just inoperative in the police station,” inyunay-unay ti baro a regional director.

Pormal nga inallawat ni Marquez ti kina-regional director manipud ken ni Police Chief Supt. Franklin Jesus B. Bucayu iti simple a seremonia a naangay ditoy idi Enero 10.

Immun-una ngem daytoy, idi Enero 8, nainstolar ni Marquez kas kabarbaro a PRO1 director sadiay National Camp Crame babaen ken ni PNP Chief, Police Director General Alan La Madrid Purisima.

Iti panagbitlana, kinuna ti kabarbaro a regional director a kasapulan nga agaramid ti intero a Region 1 police kadagiti ekstraordinario a bambanag manipud iti demanda ti serbisio publiko idinto nga inyunay-unayna a daytoy ti kadakkelan a karit kenkuana gapu iti nasayaat a nagapuanan ti sinuktanna.

“With the support from the community, we shall continue to make this place a safer place to live, and to do business just like what my predecessor PCSupt Bucayu did, especially that election period is only a couple of days at hand (Babaen ti suporta ti komunidad, itultuloytayo a pagbalinen daytoy a lugar a nataltalged a pagindegan, ken pagipasdekan iti negosio kas iti inaramid ni PC Supt. Bucayu, nangruna ta asidegen ti election period.),: innayon ni Marquez.

Kabayatanna, naigiddan bayat ti seremonia ti panaginnallawat dagiti dua nga opisial ti pannakaited dagiti pammadayaw ken ni Gen. Bucayu a pakaibilangan ti plake ti pammigbig manipud iti Association of Regional Executives (AREX), sertipiko ti pammigbig manipud iti Office of Civil Defense (OCD) ken ti Regional Disaster Risk Reduction Management Council 1 (RDRRMC-1) ken ti “Pammadayaw Award”  nga inted dagiti dadaulo ti Civil Service Commission, Philippine Ports Authority, ken ti Public Information Agency kas pammigbig kadagiti positibo a nagapuananna bayat ti panagtakemna kas PRO1 director.

Iti panagbitlana, inyunay-unay ni Bucayu dagiti di magatadan a kontribusion ti kapolisan ti PRO1, dagiti miembro ti directorial staff, dagiti sabali pay a senior officers, police commissioned officers, police non- commissioned officers, non uniformed personnel, a pakairaman dagiti sibilian, ti militar, religious ken pribado a sektor a nakitinnulong kenkuana tapno maipaayna ti kasayaatan a serbisio iti Ilocandia Region.#