BANNER NEWS: Senior board member, awan pagtsermananna a komite iti sangguniang panlalawigan

VIGAN CITY – Naglak-am iti pammabalaw ti maysa a senior board member gapu ta awan ti pagtsermananna a komite iti sangguniang panlalawigan.

Iti inaugural session ti provincial board a naangay idi Hulio 2, maikatlo nga aldaw kalpasan ti panagsapatada a bokal a mangbukel iti sangguniang panlalawigan, naglangan ni Senior Board Member Christian Purisima ket awan ti naited kenkuana a komite a pagtsermananna iti baet nga isu ti kangatuan ti nagun-od a butos iti napalabas nga eleksion.

Mapapati nga adda inasikaso a personal a banag ni Purisima iti Metro Manila.

Ngem iti biang ni Vice Governor Deogracias Victor Savellano, kinunana nga adda personal a rason no apay a naglangan ni Purisima ken awan ti pagtsermananna  ngem ketdi agmiembro kadagiti komite.

“…Nasaysayaat no isu ti sumungbat tapno awan ti misinterpretasion,” kinuna ni Savellano.

“…Adda personal a pakakumikomanna ket itedtayo daydiay kenkuana ket inton agsubli, pagsungbatentayonto tapno awan ti intriga…” kinuna ti bise gobernador.

Iti immun-una nga interbio kenkuana ti DWRS, kinuna ni Bokal Ismael Baterina a naituding iti caucus nga agpilida iti komite a pagtsermananda kas maibatay iti ranggoda iti napalabas nga eleksion.

“…Umun-una nga agpili ti nangatngato ti ranggona, sa ti sumarsaruno ti ranggona, agingga a maibbus ti komite…” panangilawlawag ni Baterina.

Segun ken ni Baterina, kinuna ni Purisima a saan nga interesado nga agtserman iti uray ania a komite ngem agmiembronto iti amin a komite.

Kastoy met la ti mapapati nga imbaga ni Purisima ken ni SP Secretary Atty. Ellen Cabatu idi tinawaganna ti bokal.

Kas maibatay iti resulta ti panagbubutos idi napalabas nga eleksion, dagitoy ti ranggo dagiti bokal: 1) Christian Purisima, 2) Ismael Baterina, 3) Jeremias Singson 4) Anicka Nicoli Zaragoza, 5) Joselle Gironella, 6) Robert Tudayan, 7) Pablito Sanidad, Jr.,  8) Constante Oandasan,  9) Jaime Singson, ken 10) Edgar Yabes.#