Footer

BANNER NEWS: Shabu queen, 4 pay tattao, natiliw iti buy-bust operation

SAN FERNANDO CITY, La Union  – Ibilang ti kapolisan ditoy a natukkolda ti dakkel a takiag ti sindikato ti droga nga agop-operar iti probinsia ti La Union iti pannakaaresto ti maysa a masuspetsa a shabu queen ken uppat pay a tattao iti naisayangkat a buy-bust operation kadakuada ditoy siudad itay nabiit.

Iti reportna ken ni Police Regional Office 1 Regional Director Police Chief Supt. Ricardo C. Marquez, kinuna ni  Police Superintendent Rolly A. Bersola, Action Officer ti Regional Anti-Illegal Drugs Special Operations Task Group (RAIDSOTG) a dua a kaso ti naipila maikontra ken ni Micaela M. Paloma alias “Mimi”, Edgar J. Gapasen alias “Pangyaw”, Herriet D. Pimentel alias “Kiray”, Rodolfo A. Baking ken maysa a lalaki a menor de edad  a tiniliw dagiti operatiba ti  PRO1 bayat ti buy bust operation nga insayangkatda iti Zandueta Street, Barangay 1, ditoy idi August 17.

Kinuna ni Bersola a nakumpiska dagiti operatiba manipud kadagiti suspek bayat ti nasao nga operasion ti siam a medium heat-sealed sachet a nagkarga iti white crystalline substance a masuspetsa a shabu, marked money, cellular phones, ken kotse a Honda CRV.

Am-ammo ni Paloma a big time drug courier manipud iti Metro Manila nga agitultulod iti droga iti La Union, segun iti report ni Bersola ken ni Marquez.

“Sinipsiputanmi ni Mimi iti napalabas a bulbulan ket iti pannakatiliwna, mainspirarkami a mangituloy iti kampaniami maikontra kadagiti drug pushers,” kinuna ni Bersola.

Dagus a naipan dagiti naaresto iti opisina ti RAIDSOTG para iti dokumentasion idinto a naipan dagiti nakumpiska nga ebidensia iti PDEA Regional Crime Laboratory para iti pannakaamirisda.

Naipila ti kaso a panaglabsing iti Sec. 11, Article II ti RA 9165 ken panaglabsing iti Section 5 kas intuding ti Section 36 ti Article II maikontra kada Paloma, Gapasen, Pimentel ken Baking.

Naipaima ti maikapat a suspek, maysa a menor de edad, iti Women and Children’s Protection Desk (WCPD) iti San Fernando City.#