BANNER NEWS: Singson, Baterina, agsango para diputado iti umuna a distrito ti Ilocos Sur

VIGAN CITY – Nagipila ni Vigan City Vice Mayor iti kandidaturana para diputado iti umuna a distrito ti Ilocos Sur itay Mayo 12.

Kinuyog dagiti sangapulo ket maysa a mayor iti umuna a distrito ti Ilocos Sur a pakairamanan ni Vigan City Mayor Eva Marie S. Medina ni Singson idi nagipila iti certificate of candidacyna iti Comelec provincial office.

Sakbay ti panagipilana iti kandidaturana, kinuna ni Singson nga excited nga agkampanian idinto nga inkarina a “1,000 percent nga igaedna pay ti agtrabaho” para kadagiti kailianna iti umuna a distrito ti Ilocos Sur.

Iti press conference a naangay kalpasan ti panagipilana iti kandidaturana, kinuna ni Singson nga ituloyna dagiti proyekto ti manongna santo dagiti prioridadna a proyekto.

Nagipila metten ni Atty. Trandy Baterina iti kandidaturana para kinadiputado iti nadakamat a distrito. iti nadakamat a distrito.

Ni Baterina ti kinasango ni dati a Cong. Ronald Singson para iti kinadiputado iti umuna a distrito iti eleksion idi 2010 a nangabakan ti naud-udi.

Nabakante ti puesto ti diputado iti umuna a distrito ti Ilocos Sur kalpasan ti panangsentensia ti Hong Kong court a maibalud ni Singson iti makatawen ken innem a bulan gapu iti panagikutna iti droga.

Intuding ti Commission on Elections ti pannakaangay ti espesial nga eleksion iti umuna a distrito iti Mayo 28 tapno mabutosan ti mangsukat iti puesto a binakantean ni Singson.

Babaen ti Resolution No. 9169, intuding ti Comelec ti panagipila dagiti agkandidato iti COC agingga iti Mayo 13 ket mangrugi ti opisial a panagkampania manipud iti Mayo 14 agingga iti Mayo 26.

Binilin metten ti poll body ti panangipakat ti kapolisan iti gun ban iti intero a probinsia.

Sagudayen pay ti nasao a resolusion a manipud iti Abril 28 agingga iti Mayo 27, maiparit ti pannakayisio dagiti appointments, promosions, pannakabuangay dagiti kabarbaro a puesto, panagipuesto kadagiti baro a posision wenno panangited iti salary increase kadagiti opisina ti gobierno, ahensia wenno instrumentalidad, kas sinaguday ti Omnibus Election Code.

Intuding pay ti Comelec ti election period manipud Abril 28 agingga iti Hunio 7 ket karaman dagiti maiparit bayat daytoy a panawen ti pannakabaliw ti teritorio ti baro a pagbutosan a presinto ken panangipasdek iti baro a presinto; panagikuyog kadagiti armas; pannakaiyalis wenno pannakaidetalye dagiti opisial ken empleado kadagiti opisina ti gobierno, a pakairamanan dagiti mangisursuro iti pagadalan publiko; ken iti panagaramat dagiti kandidato kadagiti badigard wenno security personnel, miembroda man wenno saan iti kapolisan, militar ken sabali pay a law enforcement agencies.#