BANNER NEWS: Soldado, rebelde nga NPA, nagudas iti ranget iti Cervantes

CAMP PRES. ELPIDIO QUIRINO, BANTAY, Ilocos Sur – Nagudas ti maysa a soldado ken maysa a rebelde a kameng ti New People’s Army iti panagranget ti tropa ti gobierno ken grupo dagiti local communist terrorists iti Cervantes, Ilocos Sur idi rabii ti Septiembre 24.

Segun iti report a dimmanon iti police provincial office ditoy, agpatpatrolia ti tropa ti Philippine Army nga indauluan ni Lt. Ferelino iti Sitio Bulaga, Barangay Aluling, Cervantes, Ilocos Sur idi pinaratupot ida dagiti sumurok-kumurang 20 nga armado a tattao a mapapati a kameng ti NPA ket nakiranget dagiti soldado.

Nagpaut ti ranget iti dandani dua nga oras.

Killed in action (KIA) ni PFC. Benjamin C. Ventura, Jr., idinto a saan pay a nabigbig ti sabali a natay a rebelde nga NPA.

Naipan ti bangkay ti rebelde iti Cervantes Municipal Police Station para iti umisu a disposision idinto a naiyeroplano ti bangkay ni Ventura iti Philippine Army headquarters.

(Iti pannakaisurat daytoy, adda report manipud iti Cervantes police station nga adda manen engkuentro iti nagbaetan ti 50ID PA ken LCTs iti Sitio Tabayag, Barangay Cervantes, Ilocos Sur idi agarup alas 3:30 ti malem ti Septiembre 26. – Ed.)

Dua a residente iti Barangay Aluling, Cervantes, Ilocos Sur nga agnagan iti Francis Tengedan y Inali, 40, naasawaan, provincial checker (ENRMO) ken Mateo Sawey y Simongo, 28, mannalon,  ti inaresto dagiti soldado iti nakapasamakan ti ranget.

Naipakatan dagiti dua iti paraffin test babaen ti Crime Laboratory Office 1 nga indauluan ni Police Supt. Neviro Daciego tapno maammuan no positiboda iti pulbora.

Nakarekobre pay dagiti soldado iti dua nga M16 armalite rifles ken maysa a Kenwood ICOM radio a mapapati a nabati dagiti naglibas a LCTs iti encounter site .

Daytoy ti maikadua nga engkuentro a napasamak iti nagbaetan ti New People’s Army ken ti tropa ti gobierno iti las-ud ti dua nga aldaw.

Maysa a soldado ti nasugatan iti panagranget dagiti kameng ti PA nga indauluan ni Col. Nolie Enquillano ken sumurok kumurang 30 nga armado a tattao a LCTs iti Sitio Paksao, Barangay Remedios, Cervantes, Ilocos Sur idi agsapa ti Septiembre 23.

Naitaray iti Bessang Emergency Hospital ni PFC Jessie Camacho a nasugatan iti ranget.

Mapapati nga adda nagudas iti biang ti NPA iti ranget a nagpaut iti tallo nga oras kas maibatay kadagiti dara iti nakapasamakan ti engkuentro.

Nakarekobre pay dagiti soldado iti maysa nga M14 ken maysa nga M16 a napanawan dagiti nakarangetda.

Kabayatanna, napilaan iti kaso a rebellion iti opisina ti Assistant Provincial Prosecutor, Tagudin, Ilocos Sur da Edward Galao y Galleto, 30, baro, mannalon ken residente iti Sitio Cabaroan, Barangay Concepcion, Cervantes, Ilocos Sur ken Hilario Bantiwan y Waglan, 50, baro, mannalon ken residente iti Sitio Sisikan, Barangay Tabio, Mangkayan, Benguet.

Iti clearing operation nga insayangkat ti tropa iti nakapasamakan ti ranget, nasalamaanda ni Galao a nagtagiarmas idinto a maitudtudo ni Bantiwan a miembro ti local communist terrorist.#