Footer

BANNER NEWS: Special task groups nailunsad para high risk provinces

SAN FERNANDO, La Union – Inyussuat ti Police Regional Office itay Disiembre 6 ti espesial a task groups para kadagiti tallo a probinsia iti Region 1 a nairaman iti listaan dagiti high risk a probinsia iti eleksion inton Mayo 2013.

Kinuna ni Regional Director Chief Superintendent Franklin Jesus B. Bucayu a nabuangay dagiti Regional Special Operations Task Groups (RSOTG) nga agpalutpot ken mangburak kadagiti partisan armed groups nga agraraira iti Region I, pannakarekobre dagiti loose firearms, pannakaaresto dagiti most wanted persons,  ken dadduma pay a threat groups para iti naseguridad ken patas nga eleksion inton Mayo 2013.

Natudingan a mangidaulo iti RSOTG da PChief Supt. James B. Bucayu, Executive Officer ti Directorate for Integrated Police Operations, Northern Luzon (DIPO-NL), Task Group Commander para iti Pangasinan, PSSupt Manolito C. Labador, Deputy Regional Director for Operations kas TG commander iti Ilocos Sur, ken PSupt. Reynaldo G. Biay, Battalion Commander of the Regional Public Safety Battalion 1 (RPSB 1), para iti La Union.

Itay nabiit, innaganan ni Interior and Local Government Secretary Mar Roxas dagiti 15 a probinsia a nairaman iti priority watch list ti PNP a posible a pakapasamakan ti kinadamsak iti masungad a 2013 elections.

Tallo a probinsia iti Region I ti nairaman a “high risk areas” a pakaibilangan ti Ilocos Sur, La Union ken Pangasinan. Karaman pay iti listaan ti Basilan, Batangas, Cagayan, Cavite, Lanao del Sur, Maguindanao, Masbate, Misamis Occidental, Nueva Ecija, Pampanga, ken Samar.

“Kas maibatay kadagiti data kadagiti napalpalabas nga eleksion nga inukkon ti DILG ken ti PNP, maikonsidera dagitoy 15 a probinsia a nangato ti risgona, kayatna a sawen, mabalin a pakapasamakan iti nadamsak nga insidente nga adda pakainaiganna iti eleksion,” kinuna ni Roxas idinto nga innayonna nga iprioridadda ti pannakaisagana ti seguridad para iti eleksion.

Kinuna pay ni Roxas a 60 dagiti aktibo a private armed groups (PAGs), idinto a 47 dagiti potensial nga agbalin a PAGs a posible nga aramaten dagiti politiko a mangpaksiat ken mangbutbuteng kadagiti botante iti eleksion inton Mayo 13, 2013.

Innayon ni Roxas nga adda 25,065 loose firearms iti pagilian a saan a nairehistro, ken 552,338 nga armas a saanen a napabaro ti lisensiada a mabalin a maaramat iti kinadamsak.

Ngem impetteng ni Gov. Luis “Chavit” Singson a natalna ti Ilocos Sur kadagiti napalpalabas nga eleksion ken awan dagiti naisayangkat a pammaltog nga adda nakainaiganda iti politika.

Kinuna ti gobernador a kapatangnanto ti sekretario tapno ammuenna no nangalaanna ti rekord a nangibatayanna a maysa a high risk a probinsia ti Ilocos Sur iti eleksion inton Mayo 2013.

“Amangan no daydi pay la rekord idi 1970s ti nagbatbatayanna (Roxas),” kinuna ni Singson.

Maipalagip nga iti dayta a panawen, maysa ti Ilocos Sur kadagiti tinawen a hot spot gapu kadagiti pammapatay, ambush, pammutbuteng, ken dadduma pay a kinadamsak a mapapati nga insayangkat dagiti saka-saka, birngas dagiti armado a pasurot ti maysa a nabileg a politika.

Kabayatanna, nangipasa ti League of Municipal Mayors in Pangasinan iti resolusion a mangkidkiddaw iti DILG a mangikkat iti probinsia iti listaan dagiti 15 a probinsia a high risk areas.

Indagadag met ni Gov. Amado Espino, Jr. kadagiti hepe ti polis iti probinsia ti panangannongda kadagiti pagrebbenganda kas ibilbilin ti konsensiada idinto nga impaganetgetna kadakuada a bay-anda ti politika kadagiti politiko tapno masigurado ti nadalus ken natalna nga eleksion.

Kaaduanna kadagiti maideploy a kameng ti RSOTG dagiti polis manipud iti regional level tapno mapreserba ti neutralidad, kinuna ni Bucayu.#