Footer

BANNER NEWS: Status quo ti presio ti karne ti baboy: Konseho ti Vigan

VIGAN CITY – Nagkirem dagiti aglaklako iti karne ti baboy iti sanguanan ti natibker a pagtaktakderan ti sangguniang panlungsod a maipakat ti status quo kabayatan nga ad-adalenda ti kiddaw dagiti meat vendors a maingato ti presio ti karne ti baboy ditoy siudad.

Idi Domingo ken Lunes, immadu dagiti naparti a baboy iti slaughterhouse, kinuna ni Slaughterhouse master Dr. Arnulfo Quitoriano.

Iti maysa a press conference nga inangay ti sangguniang panlungsod a nangibatadann dagiti konsehal iti pagtaktakderanda iti nasao nga isyo, impakitada nga adda latta ganansia dagiti aglaklako iti karne ti baboy ditoy siudad uray iti presio a P170 kada kilo manipud iti P115-P125 kada kilo iti liveweight.

Kinuna ni Konsehal Benjo Verzosa, chairman ti committee on market, a nagpapartida iti baboy tapno maammuan no pudno ti irakrakurak dagiti meat vendors nga agpukawda iti agdama a presio ti karne ti baboy a P170 kada kilo.

Segun iti konsehal, natakuatanda nga iti presio a P170 kada kilo iti baboy a liveweight a nagatang iti P115 kada kilo, agganansia pay laeng dagiti aglaklako iti P1,500.00; no mailakoda iti P180 kada kilo, agganansiada iti P2,400.00 ket iti P190 kada kilo, agganansiada iti P3,276.00.

Kinuna ni Verzosa a no magatang ti liveweight a baboy iti P120 ket mailakoda iti P170 kada kilo, agganansia dagiti meat vendors iti P1,100.00; no mailakoda iti P180 kada kilo, aggansiada iti P1,948.00; ket no P190 kada kilo, P2,796.00.

Innayon ti konsehal a no nagatang ti liveweight iti P125.00 kada kilo ket mailakoda iti P170 kada kilo, agganansia pay laeng dagiti meat vendors iti P620.00; no P180 ti pakailakuanda kada kilo, agganansiada iti P1,465.00  ket no P190 kada kilo, agganansiada iti P2,316.00.

Kinuna ni Verzosa a maysa met a negosiante, a nasurok laeng a P699.60 ti suma total ti expenses dagiti meat vendors manipud iti pannakaparti ti baboy agingga iti pannakaipanna iti tiendaan tapno mailako.

Sakbayna, iti privilege speech ni Konsehal George Villanueva, linagidawna ti panangilaok dagiti meat vendors dagiti karne ti baboy nga addaan tulang ken puro lasag nga ilaklakoda iti tiendaan publiko ti Vigan.

Ngem alegasion dagiti meat vendors a no dida paglaoken dagiti lakoda a karne nga addaan tulang ken lasag,  agpukawda iti presio a P170 kada kilo agsipud ta ngimmina ti presio ti gatangenda a liveweight a baboy.

Kinuna dagiti meat vendors a manipuden iti P120-agingga iti P127.00 ti presio ti liveweight a baboy ket saandan a maparuar no saanda nga ilaok dagiti karne nga adda tulangna kadagiti puro lasag.

Dinawat ketdi dagiti meat vendors ti pannakaingato ti presio ti karne ti baboy manipud iti P170 iti P190 kada kilo.

Ngem nangiparuar ni Vice Mayor Lourdes Baquiran iti pammilin kas agdama idi a mayor a nangisuno ken ni Mayor Eva Marie S. Medina bayat ti kaawan daytoy, kadagiti aglaklako iti karne a saanda nga ilaok dagiti karne nga adda tulangna kadagiti puro a lasag ken panangsurotda iti presio a P170 kada kilo.

Kas reaksionda, awan ti meat vendors a naglako iti karne ti baboy idi Marso 21 a nakaigapuan ti panagriri dagiti consumers, nangruna dagiti pasdek-negosio a pakaibilangan dagiti restaurants ken otel.

Ngem impatengteng ti sangguniang panlungsod nga status quo ti presio ti karne ti baboy ken saan nga aglaok dagiti adda tulangna iti puro lasag.

Imballaag pay dagiti konsehal a maipakatan iti sanction ti asinoman a meat vendors a saan a mangitaltalek iti status quo order ti sangguniang panlungsod.#