BANNER NEWS: Summit naangay tapno matratar yaadu kaso ti dengue

VIGAN CITY – Iti baet ti pannakaideklara ti Ilocos Sur nga under state of calamity gapu iti dengue, ken dagiti addang nga inwayat ti provincial government ken local government units tapno malapdan ti panagrairana, agtultuloy latta ti yaadu ti bilang dagiti kaso daytoy a sakit.

Iti kaudian a report manipud manipud ken ni Benjamin Castillo ti Provincial Health Team Office, immabuten iti 2,293 dagiti nagsakit iti dengue iti probinsia ken addan 12 a natay manipud idi Enero agingga iti maikadua a lawas ti Agosto daytoy a tawen.

Kanaig daytoy, nangangay ti gobierno probinsial iti dengue summit iti Baluarte ditoy siudad a dinar-ayan dagiti agtuturay ti probinsia, municipal officials, municipal health units, barangay health workers ken dadduma pay a maseknan nga ahensia tapno tratarenda daytoy a problema ti salun-at a pagam-amkan nga agbalin nga outbreak no saan a maipaayan iti naing-inget a pannakasolbar.

Idi Agosto 1, indeklara ni Gov. Luis “Chavit” Singson nga under state of calamity ti probinsia gapu iti sakit ti dengue kalpasan nga immabut iti 10 ti natay iti daytoy a sakit ken simmuyop ti bilang ti kaso ti dengue iti nasurok a sangaribu ket dua gasut.

Iti pannakaideklara ti pro-binsia nga under state of calamity gapu iti dengue, maaramaten ti gobierno probinsial ti calamity fund a pangtulong kadagiti agindeg iti probinsia nga agsakit iti dengue.

Kinuna ni Gov. Luis “Chavit” Singson nga awanen ti gastuen dagiti dengue patients a maiserrek kadagiti district hospitals.

Iti report manipud iti Regional Epidemiology and Surveillance Unit iti San Fernando City, La Union, manipud iti Enero 1 agingga iti Agosto 2 daytoy a tawen, addan nairekord a 1,244 a kaso ti dengue iti Ilocos Sur, ngim-mato iti 292% no maikumpara idi 2010 nga adda laeng 317 a kaso daytoy a sakit.

Kas addangna tapno malap-dan ti panagraira ti nasao a sakit, binuangay pay ti go-bierno probinsial ti provincial dengue task force ken pina-aktibona manen ti barangay dengue brigades ken iti pannakapapigsa dagiti blood bank units ti Philippine National Red Cross ken ti Gabriela Silang General Hospital idinto a nangisayangkat kadagiti information dissemination para iti ad-adda pay a pannakaammo maipapan iti dengue ken iti pannakaiwayat iti ad-adda pay a panagdalus iti arubayan ken panagipattog kadagiti amin a paggianan ti danum a pagit-logan ken pagindegan dagiti lamok ken iti pannakaisa-yangkat kadagiti fogging operations nangruna kadagiti lugar a paggapuan dagiti adu nga agsakit iti dengue.

Kabayatanna, uppat nga ili ken dua a siudad a pakaibila-ngan ti Vigan, Candon City, Bantay, Santa, Sta. Cruz, ken Caoayan ti masipsiputan gapu iti isusuyop dagiti bilang dagiti agsakit iti dengue kadagitoy a lugar.

Ti sumaganad ti kaudian a report dagiti kaso ti dengue ken natay iti probinsia: Vigan City – 232; Sto. Domingo – 201, 1 natay; Cabugao – 192 kaso, 3 natay; Bantay – 192, 1 natay;  Sta. Lucia – 165, 3; San Juan – 162; Candon City – 140, 1 natay; Magsingal – 116; Tagudin – 92, 1 natay; Sinait – 89; Sta. Cruz – 86, 1 natay; Santiago – 76; Narvacan, 69, 1 natay; Sta. Catalina ken Caoayan – tig-68; San Vicente – 61; Sta. Maria – 54; San Ildefonso – 37; Lidlidda – 36; Suyo – 34; Santa – 25; Sugpon – 17; San Emilio – 16; Alilem – 13; Burgos ken San Esteban – tig-8; Banayoyo ken  Nagbukel – tig-7; Quirino – 5; Del Pilar – 4; Galimuyod – 3; ken Sigay – 1.#