BANNER NEWS: Sumukat ken ni Cong. Singson, agdalan iti konsultation: Chavit

VIGAN CITY – Kinuna ni Gov. Luis “Chavit” Singson nga angayennanto pay ti konsultasion kadagiti lider ti partido tapno pilienda ti kandidato para iti maangay nga special election kalpasan a nabakante ti puesto ti representative iti umuna a distrito ti probinsia.

Idi dinamag ni Jun Ramos bayat ti interbiona kenkuana a naipatangatang iti DWRS Commando Brigada no awatenna no isu ti iduron dagiti lider ti probinsia a kumandidato para iti nabakante a puesto ti diputado iti umuna a distrito maigapu iti panaglusulos ti anakna a ni Cong. Ronald Singson, insungbat ti gobernador a pagsasaritaandanto pay dayta a banag kadagiti lider ti probinsia.

Kinuna ni Singson a bayat ti kaawan ti mangibagi iti umuna a distrito ti probinsia, ni pay laeng House Speaker Feliciano Belmonte ti agakem a kas caretaker iti umuna a distrito.

Kinuna pay ti gobernador nga agtuloy ti pannakayimplementar dagiti proyekto ni Cong. Singson uray saanen nga isu ti mangibagi iti umuna a distrito.

Immun-una iti daytoy, naipalpalapayag a ni Singson wenno ni Cong. Owen Singson ti maikadua a distrito ti Ilocos Sur ti agbalin a caretaker agingga iti adda mapili a mangibagi iti umuna a distrito.

Ngem iti maysa nga interbio kenkuana ti media, impalawag ni Atty. Ferdinand Rafanan, hepe ti Comelec Law Department, nga special elections ti kasapulan iti umuna a distrito iti Ilocos Sur, saan a ti mangipatugaw iti maysa a caretaker.

Kinuna pay ni Rafanan a mangangay ti Commission on Elections iti special elections kalpasan ti panangipasa ti Kamara iti resolusion mainaig iti daytoy kalpasan a maideklara ti panagbakante ti umuna a distrito ti Ilocos Sur.

Kastoy met laeng ti nagbalin nga opinion ni Comelec spokesperson James Jimenez ket kinunana nga uray saanen a maituding ti caretaker iti kanito a maikkat ti maysa nga agilinlinteg iti Kamara agsipud ta maangayto met la ti espesial nga eleksion.

Pormal a naglusulos idi Marso 1 ni Diputado Ronald Singson a kas pannakabagi ti first district ti Ilocos Sur kalpasan ti pannakasentensiana a mabalud iti makatawen ken innem a bulan gapu iti panagikutna iti maiparparit a droga.

Naaresto ni Singson idi Hulio 19, 2010 iti Check Lap Kok Airport kalpasan a naduktalan iti ikutna ti 6.67 gramo a cocaine ken dua a tableta ti Nitrazepam wenno Valium.#