BANNER NEWS: Suspek iti Lacasandile killing, miembro iti grupo a nainbolbar iti drug ken gun running activities: PNP prov’l director

TAGUDIN, Ilocos Sur -Miembro iti grupo a nainbolbar iti drugs ken gun running activities ti simmuko a suspek iti pannakapapatay ni Judge Reynaldo Lacasandile, daytoy ti impalgak ti provincial director.

Iti interbio kenkuana ti Bombo Radyo Vigan, kinuna ni Police Senior Supt. Eduardo Dopale a kameng ni Rodrigo Urmin, maysa kadagiti suspek iti pannakapapatay ni Judge Reynaldo Lacasandile, iti Alviento Group a mapapati a nainbolbar iti drugs ken gun running activities iti maikadua a distrito ti probinsia.

Simmuko iti National Bureau of Investigation ni Urmin, mapapati a  drayber ti motorsiklo a naaramat iti pannakaisayangkat ti pammapatay ket intudona  ni Benson Sudario Alviento a triggerman iti pannakapapatay ni Lacasandile.

Maibatay iti kumpesar ni Urmin, kinasuan ti NBI iti murder¬† iti Department of Justice da Benson Sudario Alviento, Rodrigo Urmin,¬† Henry¬† Galapate, ken maysa nga agalias iti ‚ÄúTemy‚ÄĚ, agpapada a residente iti nadumaduma a barangay iti Candon City ken dagiti tallo a di nainaganan a kakaduada.

Mapapati a rinekrut da Alviento, Galapate ken Temy ni Urmin mainaig iti planoda a mangpapatay ken ni Lacasandile.

Kinuna ni Dopale  a nupay addan dagiti nakasuan, agtultuloy ti panagimbestiga ti Task Force Lacasandile mainaig iti  nasao a murder case.

Kinuna ni Dopale nga  itultuloy  ti task force  ti makikoordinar iti NBI tapno maikumparada ti inbestigasionda iti rebelasion ti suspek iti NBI.

Kinuna ti provincial director nga iti isusuko ni Urmin iti NBI, awan ti naaramid a koordinasion iti Task Force Lacasandile ket di pay ammo no ania dagiti rebelasion ti nasao a suspek wenno impormasion  mainaig iti pammapatay.

Innayon ni Dopale nga adda dagiti text messages a naawat ti regional office a mapapati a naggapu ken ni Urmin ngem saan met a nagparang daytoy.

Kasta met a kinuna pay ni Dopale nga adu dagiti mensahe a naawatda mainaig iti pannakapapatay ni Lacasandile ngem narigat a patien amin a naipatulod ta agsasabali dagiti impormasion.

Kinuna ni Dopale a narigat a patien amin dagiti naibaga iti text a perpetrators iti pammapatay wenno mabalin anga adda laeng mangiyad-adayo iti inbestigasion.

Segun iti NBI, karaman ni Urmin kadagiti suspek nga immar-arubayan iti pagtaengan ni Lacasandile iti Barangay Salvacion idi bulan ti Septiembre.

Maipalagip nga idi parbangon ti Oktubre 4, agur-uray ni Lacasandile  iti luganna nga agpa-Vigan City iti igid ti national highway a sakup ti Barangay Lacong, Tagudin idi inasitgan ti dua a suspek a naglugan iti motorsiklo sada pinaltogan.

Awanen ti biag ti biktima idi maidanon iti ospital.

Mapapati a work-related ti motibo ti pammapatay.#