BANNER NEWS: Suspek iti panagrames, an-anupen dagiti polis

VIGAN CITY – Agtultuloy ti pananganup dagiti polis ditoy iti suspek a nangbagbagsol iti babai a pinanggepna a ramesen iti maysa a pagkaseraan sadiay Barangay III ditoy siudad idi parbangon ti Nobiembre 27 .

Kinuna ni Vigan City Chief of Police Supt. Jugith del Prado a madama a mabirbirok ni Rolando Garcia y Padalipin, 33, tubo ti Arayat Batasan, Pampanga, agkaskasera iti Baquiran Boarding House, Salcedo Stree, Barangay III kalpasan ti panangbagbagsolna ken ni Janice Paragas y Borose, 28, tubo iti Davao City ngem agkaskasera met iti nasao a boarding house.

Pinanggep a ramesen ni Garcia ni Paragas ngem nakiranget daytoy a puon ti nangbagbagsolan ti suspek iti biktima.

Segun iti inisial nga imbestigasion dagiti polis ditoy siudad, kadua ti biktima ti anakna a ni Joshua Ray, 6, a naturog iti kuartoda iti dayta a rabii.

Idi agarup alas tres ti parbangon ti nadakamat a petsa, napuotan ti biktima a nakababa ti pantina ken rabrabawanen ti suspek.

Ngem nakiranget ken nagpaarayat ti biktima ket binagsol ti suspek a nagsagrapan ti babai kadagiti sugat iti nadumaduma a paset ti bagina a pakairamanan ti uppat a bagsol iti sango, dua iti likud ken maysa iti akimbaba a paset ti luppona.

Iti kaudian a damag, naglasat ti biktima iti operasion iti Gabriela Silang General Hospital a nakaitarayanna ket maob-obserba pay laeng ti kasasaadna.

Maysa nga agnagan Dolly Vasquez Garcia, kabsat ti suspek, ti nangitaray ken ni Paragas iti ospital.

Ngem kinuna ni del Prado a narupaan ti biktima ti suspek ket adda napirmaanna a deklarasion nga isu ti nangpanggep a mangrames ken nangbagkong kenkuana.

Adda nasarakan ti SOCO team a panty, maris nakusnaw a pink, ken Swiss knife nga agatiddog iti 4 a pulgada iti ngatuen ti idda ti biktima.  Ngem mamati ti polis a saan a daytoy ti naaramat iti krimen agsipud ta awan ti darana.

Kinuna ni del Prado a sumagmamano pay laeng nga aldaw nga agkaskasera ti biktima iti nasao a boarding house ken agbirbirok iti trabahona.

Segun pay iti hepe, adda immuna a  kaso ti panagrames a naiyuli iti korte kontra ken ni Garcia a napasamak met laeng iti maysa a boarding house a maysa a menor de edad ti nagbalin a biktima.

Innayon ti del Prado a maur-uray  pay laeng ti warrant para iti pannakaaresto suspek mainaig iti immuna a kasona.

Kinuna ni del Prado nga itultuloyda a biroken ti suspek idinto nga innayonna a posible nga adda pay kaso daytoy iti probinsia ti Pampanga a naggapuanna.#