BANNER NEWS: Suspek iti robbery iti balay ti balikbayan, nabigbigen

BANTAY, Ilocos Sur – Ibilang ti hepe ti polis ditoy nga ili a nasolbaren ti panagtakaw iti pagtaengan ti maysa a balikbayan idi Enero 14 iti pannakabigbig ti maysa kadagiti mannanakaw.

Kinuna ni Bantay OIC PSI Benedicto Gose Cardenas a nabigbig ni Jonathan Cabradilla, tubo ti Poblacion, Bauko, Mountain Province, a maysa kadagiti nangserrek iti pagtaengan ni Lucena Orenzo y Cortez, 64, naasawaan, retirado a nurse, ken balikbayan manipud iti United Kingdom.

Nabigbig ti suspek babaen ti retratona a nakapila iti roques’ gallery nga adda iti ikut ti polis ti Candon City a nainbolbar iti robbery hold-up iti napalabas.

Kinuna ni Cardenas a ni laeng Cabradilla ti nabigbig gapu ta isu laeng ti awanan abbong iti rupana idinto nga adda apiring dagiti tallo a kakaduana idi insayangkatda ti panagtakaw.

Nangiwayat ti tropa ti Bantay police station iti follow-up investigation ti polis Bantay iti Mountain Province ket ditoy a na-identify ni Cabradilla, karaman pay kadagiti agmanmaniobra iti panagtakaw iti Mountain Province, kas nailanad iti rekord ti Benguet Provincial Police Office.

Kanaig daytoy, birbirokenen dagiti polis dagiti tallo pay a kakadua ti suspek a mapapati nga agnaed met laeng iti Mountain Province.

Kinuna ni Cardenas a naipilan iti provincial prosecutor’s office iti kaso a robbery maikontra ken ni Cabradilla ken dagiti kakaduana a nainaganan pay laeng a John Doe, Peter Doe, ken Richard Doe.

Idi pumarbangon ti Enero 14, uppat nga armado a mannanakaw ti nangserrek iti balay ti balikbayan ket kinasakasda dagiti cash money nga agdagup iti P145,900.00; foreign currency (pounds) nga agdagup iti 660, assorted nga alahas ken napapateg a bambanag nga agdagup iti P207,500.00.

Intaray pay dagiti mannanakaw ti visa card dagiti biktima ken ti duplikado a tulbek ti Innova wagon, ATM cards, credit cards, driver license dagiti bumalay a pakaibilangan ni Lucena Orenzo, Lieszl Ann Orenzo, Maria Teresita Abata y Orenzo, ken ti SSS ID card ni Bonifacio Orenzo y Francia, Jr., 49, family driver ken bayaw ni Lucena Orenzo.

Iti panagimbestiga dagiti polis, nakastrek dagiti mannanakaw iti main gate babaen ti panangdadaelda iti padlock ket nagnada iti kusina a simrek iti balay babaen ti panagaramatda iti master key. Ditoy met laeng ti rimmuaran dagiti mannanakaw iti panaglibasda.

Daytoy ti maikadua a gundaway nga adda naireport a sinerrek dagiti armado a mannanakaw a pagtaengan ditoy probinsia iti umuna a dua a lawas daytoy a bulan.

Idi agarup 4:00 ti agsapa ti Enero 13, sinerrek ti sumurok kumurang lima a lallaki ti balay ni Severino Corpuz y Etrata, 63, naasawaan, retirado a public school teacher ken residente iti Imus, Santiago, Ilocos Sur.

Pinungo dagiti mannanakaw da Corpuz ken kabbalayna sada kinurimes ti 400 Euro nga agdagup iti P30,000; assorted jewelries nga agpateg iti P100,000, Sony Ipod, Netbood Laptop, 6 a selpon ken ID ken nadumaduma a tulbek.

Nangiwayat dagiti polis iti pursuit operation ngem saandan a nasapulan dagiti mannanakaw.#