Footer

BANNER NEWS: Task force, agimbestiga pannakapapatay radio broadcaster

LAOAG CITY – Maysa a task force ti binuangay ti polis ti Ilocos Norte a mangisayangkat iti naun-uneg nga inbestigasion iti pannakapapatay ti maysa a radio broadcaster iti Barangay Barit idi rabii ti Hunio 15.

Kinuna ni provincial director Police Senior Supt. Ulysses Abellera a dinesignaranna ni Police Supt. Bienvenido C. Rayco, Jr., deputy for operations, a mangidaulo iti Special Task Group (SITG) “Agustin” nga agpalutpot iti pannakapapatay ni Joselito Agustin y Rosario, 37, broadcaster ti DZJC Radio Station, Laoag City, ken residente iti Barangay Natba, Bacarra, Ilocos Norte iti agarup 9:45 ti rabii ti Hunio 14.

Karaman iti task force dagiti opisial ti PNP Crime Laboratory, Criminal Investigation and Detection Group (CIDG),  Regional Intelligence Office (RIO), ken ti National Bureau of Investigation (NBI).

(Nabigbigen ti polis ti suspek ken ti mastermind iti pannakapapatay ni Joselito Agustin, segun iti kaudian a report manipud iti Ilocos Nortre provincial police office.

Nupay kasta, saan pay nga innagan ti polis dagiti suspek ken ti mastermind gapu ta madama nga isaysayangkatda ti manhunt operation ken maisagsagana pay ti maipila a kaso maikontra kadakuada.

Ketdi, kinumpirmaran ti polis a maysa kadagiti  suspek ti maatap a nangparakapak iti pagtaengan ni Agustin idi Mayo 7. –Ed)

Napaltogan ni Agustin bayat nga agdaldaliasat ti motorsikloda, kaduana ni Joseph Agustin, 22, kaanakan ti biktima, iti national highway a sakup ti Barangay Barit ditoy met laeng siudad.

Segun iti inisial nga inbestigasion dagiti polis, dua a di nabigbig a suspek a nakalugan iti motorsiklo ti nangsurot iti lugan ni Agustin ket idi addadan iti nadakamat a barangay, linabsan ida dagiti suspek sada pinaputokan iti sumagmamano a daras ti broadcaster.

Naitaray ni Agusin iti Governor Roque Ablan, Sr. Memorial Hospital ditoy siudad ngem pimmusay iti agarup 1:15 a.m.

Saan a naan-ano ti kaanakan ti biktima.

Naglibas dagiti suspek iti saan nga ammo a direksion.

Nakarekobre dagiti inbestigador iti uppat a kapsula ken dua a buli manipud iti .45 pistol iti nakapasamakan ti krimen.

Sakbay ti pammapatay, naparakapak ti pagtaengan ti biktima idi Mayo 7.

Kitkitaen ti SITG Agustin ti posibilidad nga adda pakainaigan ti trabaho ti biktima kas broadcaster ti radio iti pannakapapatayna.#