BANNER NEWS: Tesorero ti barangay, naitudo a mastermind iti hold-ap

SAN FERNANDO CITY – Inaresto dagiti polis ti maysa a tesorero kalpasan a naitudo nga utek iti robbery-hold-up a naisayangkat iti national highway ti Barangay Parada, Sto. Domingo, Ilocos Sur idi malem ti Disiembre 17.

Naaresto ni Barangay Treasurer Edgar C. Pablico, 42, residente iti Barangay San Vicente, Magsingal, Ilocos Sur kalpasan a limtuad iti panagimbestaga dagiti polis nga isu ti mapapati a mastermind iti robbery-hold-up a nakaitarayan ti P135,741.33 para iti honorarium dagiti barangay officials iti nadakamat a barangay.

Kas maibatay kadagiti report a dimmanon iti headquarters ditoy, kagapgapu da Mario B. Urban, 59, acting barangay captain iti San Vicente, Ilocos Sur, ken Pablico a nagpasukat iti kuarta iti Land Bank ket idi agarup 2:20 ti malem ti nadakamat a petsa, aggawiddan a nakalugan iti Honda Wave motorcycle idi mapapati a hinold-ap ida ti dua a nakahelmet a lalaki a nakalugan iti di nabigbig ti klasena a motorsiklo.

Mapapati a sinurot dagiti suspek dagiti biktima ket idi addadan iti bisinidad ti Barangay Parada, binangenan dagiti suspek ti dalan sada pinaturongan dagiti biktima iti cal. 45.

Ginammatan ti back rider ti iggem ni Pablico a nalabaga nga enbelop a naglaon iti kuarta sada naglibas iti amianan a direksion.

Ngem kinuna ni Chief Superintendent Roman A. Felix, PRO1 regional director, a naaresto ni Pablico kalpasan nga itudtudo ti panagimbestiga ti Sto. Domingo police nga isu ti mastermind iti nasao a panaghold-ap ken babaen ti testimonia dagiti saksi a pakairamanan ti sworn statement ni Acting Barangay Captain Urban.

Limtuad pay iti inbestigasion nga iti kallabes, mapapati a naimbolbar ni Pablico kadagiti anomalia ken mapagduaduaan a pinansial a transaksion a pakairamanan dagiti nadumaduma nga utangna.

Naipaiman iti prosecutor’s office ti kaso a robbery hold-up maikontra ken ni Pablico ken dua a John Doe babaen ti NPS I-03-INV 14L-00641.
Imbilin pay ni Felix iti Ilocos Sur police ti panangisayangkat iti in-depth investigation tapno mabigbig ken matiliw dagiti dua pay a suspek iti nasao a robbery-hold-up. (Karaman ti report manipud iti PIO,PRO1)