Footer

BANNER NEWS: Tobacco tripartite conference, kayat dagiti provincial officials maangay iti tinawen

VIGAN CITY – Kayat dagiti agtuturay iti probinsia a tinawen ti maangay a tobacco tripartite conference iti sanguanan ti panagpangato  ti presio dagiti ganagan ken dadduma pay a kasapulan iti talon.

Impakaammo ni Vice Gov. Jerry Singson nga inaprobaranen ti konseho ti probinsia ti Resolution No. 124, Series of 2008 a mangidagadag iti pannakaisayangkat iti tinawen ti tripartite conference iti nagbaetan dagiti agparpartuat ken aggatgatang iti tabako, dagiti agmulmula iti daytoy a produkto ken ti National Tobacco Administation agsipud iti agtultuloy a panagpangato ti presio ti farm inputs kangrunaanna ti ganagan ken pestisidio.

Kinuna ti bise gobernador  a nagun-od dagiti mannalon ti nangatngato a floor prices dagiti produktoda a tabako  babaen ti initiatibo da Gov. Deogracias Victor Savellano ken Diputado Eric Singson a pannakaangay ti regular a panagmimiting dagiti provincial officials, opisial ti National Tobacco Administratioin, dagiti traders, manufacturers ken dagiti mannalon.

Idi napan a tawen, pinatgan dagiti traders ken agparpartuat iti tabako a ngumato ti floor prices ti produkto a tabako iti P10.00 kada kilo kas iti sumaganad: Grades AA – P61.00; A – P59.00 ; B – P57.00; C –P55.00; D – P50.00; E – P49.00; F1 – P45.00; F2 – P42.00; and R – P23.00.

Iti trading season idi napan a tawen, immabut iti P70 ti presio ti Class AA a tabako, banag a nakaragsakan dagiti agmulmula.

Kabayatanna, kinuna ni Gov. Deogracias Victor “DV” Savellano a kasapulan manen ti renegosasion iti pannakaituding ti floor price ti tabako agsipud iti agtultuloy nga ingingina ti ganagan, pestisidio ken dadduma pay a farm inputs iti panagmula dagiti mannalon iti daytoy kangrunaan a produkto iti probinsia.

Kinuna ti gobernador a dawatenda ti pannakaituding ti umuna a lawas ti Oktubre para iti tinawen a pannakaangay iti tripartite conference sakbay ti panagbunubon dagiti mannalon, saan a kas iti agdama a maangay ti kumperensia tunggal dua a tawen.

Ti Ilocos Sur ti kadakkelan iti produksion iti tabako kadagiti tobacco-producing provinces a pakairamanan ti Ilocos Norte, La Union ken Pangasinan, ngarud, kadakkelan iti bingay iti excise ti tabako kas intuding ti R.A. 7171 a putar ni dati a Gov. Luis Chavit Singson idi diputado iti umuna a distrito ti Ilocos Sur.#