BANNER NEWS: Tricycle driver, ginandat a gudasen riding in tandem

STA. CATALINA, Ilocos Sur – Saan pay nga ammo dagiti inbestigador ditoy no asino dagiti nanggandat iti biag ti maysa a tricycle driver sadiay Barangay Pangada ditoy nga ili idi malem ti Oktubre 30.

Naitaray ni Frando Domingo y Cajecal, 59, naasawaan, ken residente iti Bantaoay, San Vicente, Ilocos Sur gapu iti sugatna iti makannigid nga akimbaba a pangana maigapu iti panangpaltog kenkuana dagiti di pay nabigbig a tattao a nagkalubbon iti motorsiklo idi agarup 3:16 ti malem iti nadakamat a petsa.

Iti pannakaisurat daytoy, nakalasaten iti peggad ni Domingo.

Saan pay nga ammo ti motibo ti pannakagandat ti biag ni Domingo.

Iti panagimbestiga dagiti polis, agpalaud a direksion ti nalabaga a traysikel a Yamaha STX a minaneho ni Domingo ket idi makadanon iti amianan a sungaban ti Govantes bridge iti Barangay Pangada, pinaltogan dagiti suspek manipud iti likudan a nakalugan iti motorsiklo.

Naitaray ni Domingo iti St. James Hospital, Vigan City para iti pannakaagas ti sugatna idinto a naglibas dagiti suspek nga agturong iti ili a Bantay.

Kinamat dagiti nagresponde a polis dagiti suspek a naglugan iti motorsiklo iti panaglibasda ngem napardas ti panagpataray dagitoy ket nalusotanda dagiti polis.

Mapapati a nagpaputok dagiti polis ngem saan nga intaltalek dagiti suspek.

Idi makadanon dagiti polis agingga iti intersection ti Highway sadiay Bantay, saandan a nakita ti nagturongan dagiti suspek.

Segun dagiti kimmamat a polis, medio panglukmegen ti suspek a naglugan iti likud ti motorsiklo.

Nagpatulong pay dagiti polis kadagiti kabangibangda a police station para iti pannakatiliw dagiti suspek ngem negatibo ti resultana.

Nakarekobre dagiti inbestigador iti dua a kapsula, maysa a deformed slug a mapapati a nagtaud iti cal. 45. Nakasarakda pay iti fired cartridge case iti isu met laeng a kalibre iti uneg ti traysikel ti biktima.

Kinuna ni COP Viaje nga agtultuloy ti panagimbestigada no ania ti motibo iti pannakagandat iti biag ni Domingo.#