BANNER NEWS: Tricycle driver, ginudas armado a lallaki a riding in tandem

VIGAN CITY – Maysa manen a biag ti inwalang dagiti armado a tattao a nagkalubbon iti motorsiklo iti kalsada a sakup ti Barangay Capangpangan ditoy siudad idi aldaw ti Marso 8.

Naideklara nga awanen ti biagna ni Randy Palacpac y Aporongao, 31, naasawaan, tricycle driver, residente iti Shelterville a masarakan iti Barangay San Julian ditoy idi maidanon iti St. James Hospital. Saan pay a nabigbig dagiti pimmatay ken ni Palacpac a nailadawan a nagaruat iti helmet ken nalabaga a diaket. Idi naawatda ti report ti pammaltog, nagresponde dagiti polis ditoy nga indauluan ni COP Police Supt. Elpidio R. Nartatez ket naammuan iti inisial nga inbestigasionda a napaltogan ni Palacpac bayat ti panagdaliasat ti Honda TMX tricycle a minanehona iti kalsada a sakup ti Barangay Capangpangan idi agarup alas 10 ti aldaw.

Kagapgapu ti biktima a napan nangsukon iti anakna ken ti kaanakanna nga agpada nga agbasbasa iti Burgos Memorial School East, Barangay III ket aggawiddan idi pinaltogan dagiti di pay nabigbig a tattao. Immun-una ngem daytoy, idi malem ti Marso 5, napapatay ti maysa a radio technician iti Barangay Bayubay Norte, San Vicente, Ilocos Sur.

Impatay a dagus ni Joseph Winston Rosal y Guerrero, 46, baro ken residente iti nadakamat a barangay, dagiti sugatna iti rupa, likud ti ulona ken iti makannigid nga imana. Iti inisial nga inbestigasion dagiti polis, daldalusan ti biktima ti chop chop a luganna iti garahe idi inasitgan a paltogan ti di pay nabigbig a tao. Nagsawar dagiti nagresponde a polis ngem nakalibasen ti suspek.#