BANNER NEWS: Vigan City, Cebu, Iloilo, nairaman a mapagpilian iti New7Wonder Cities

VIGAN CITY – Tallo a siudad ditoy pagilian a pakairaman daytoy napnuan pakasaritaan a siudad ti nairaman a pagpilian para iti New7Wonder Cities, daytoy ti inwaragawag ti presidente daytoy prestihioso a New7Wonders itay Oktubre 7.

Inwaragawag ni New7Wonders Founder-President Bernard Weber nga iti naangay nga online voting a nangrugi pay idi Marso 2012, imbalat ti Vigan City, Cebu ken Iloilo dagiti nasurok 200 a siudad iti lubong tapno mairamanda iti listaan dagiti 77 a pagpilian para iti New7WonderCities.

Kas mabasa iti website ti New7Wonders, kinuna ni Weber a daytoy a listaan ti mangiyanninaw iti enerhia ken kultura ti siudad iti kapintasan nga agpang.

Manipud iti “long list” mapabassit ti listaan iti 28 ket dagitoy ti mapagpilian babaen iti online voting inton Oktubre 21.

Maiwaragawagto dagiti mapili a pito a kangatuan a siudad iti arinunos ti 2014.

Ti New7Wonder Cities ti maikatlo a global a pasalip nga angayen ti New7Wonders. Immuna ti  New 7 Wonders of the World ken ti New7Wonders of Nature. Nainominar dagiti naisangsangayan a siudad manipud iti Africa, Arab States, Asia and the Pacific, Europe ken Canada ken ti Latin America ken iti Caribbean.

Maipalagip a maysa kadagiti napili a New7Wonders of Nature ti Puerto Princesa sadiay Palawan gapu iti 8.2 kilometro ti kaatiddogna nga underground river ditoy a pakasarakan pay kadagiti higante nga stalactites ken stalagmites formations ken dagiti kueba.

Manipud idi nainominar ti Vigan City iti New7Wonder Cities, rinugian da Mayor Eva Marie S. Medina ken dagiti city officials ti agresibo a kampaniada a pannakaibutos ti siudad iti online tapno makasagpat iti sumaruno a level ken dumakkel ti tsansana a mapili a maysa kadagiti pito a pagsidsiddaawan a siudad iti lubong.

Ti Vigan ti kakaisuna a siudad iti pagilian manipud iti Asia ken Pacific Region a kameng ti Organization of the World Heritage Cities.

Naawagan daytoy a grupo a World Heritage Cities gapu iti pannakapreserba ti kaadaanan a kultura, dagiti istruktura ken pasdek a pakakitaan ti panagbiag kadagiti naglabas a siglo nga adda pay la ita a nawaya a maimatangan ken masaksian. Napreserba dagitoy a lugar a saan laeng a pangtaldiapan iti napalabas a panawen no di ket pakaekperiensaan a mismo iti kabibiag ken panagbiag iti napalabas.

Kas maikatlo a kaduogan a siudad iti pagilian, simmaruno iti Cebu ken Manila a simmangladan dagiti Espaniol, ti Vigan City ti sibibiag a pammaneknek ti kinabaknang ti kultura ken kannawidan dagiti Ilokano, ken iti pakabuklanna, dagiti Filipino.

Iti babaen ti administrasion ni Vigan City Mayor Eva Marie S. Medina, saan laeng a nasalimetmetan ken nasalakniban dagiti duog a balay a bato iti Heritage Village no di pay natarimaan ken napasublida iti punganay a kita ken arkitekturada.

Kabalubal ti Vigan City, Cebu ken Iloilo dagiti 77 a siudad a karaman iti “long list” kas ti  Athens, Greece; Barcelona, Spain; Bethlehem, Palestine; Buenos Aires, Argentina; Casablanca, Morocco; Istanbul, Turkey; Kyoto, Japan; Las Vegas, U.S.; Naples, Italy; New York, U.S.; Panama, Panama; Rome, Italy; St. Petersburg, Russia;  Singapore, Singapore;  Surakarta, Indonesia; Sydney, Australia; Tokyo, Japan; Toronto, Canada ; Zurich, Switzerland ken dadduma pay a dadakkel a siudad iti lubong.#