Footer

BANNER NEWS: Vigan City COP nabilin a mangiwayat in-depth investigation iti masaker

SAN FERNANDO CITY – Imbilin ti PNP regional director ditoy ti panangisayangkat ti Vigan City police iti in-depth investigation iti pannakamasaker ti maysa a pamilia iti nadakamat a siudad idi Agosto 2.

Iti report a dimmanon iti Police Regional Office 1 ditoy, uppat a kameng ti pamiliana ti nagsasaruno a ginudas ni Edwin Espinueva y de Vera, 37, negosiante, natibo ti Baguio City ngem agnaeden iti Barangay 2, Vigan City, sana pinaltogan ti bukodna a bagi iti pagtaenganda sadiay Barangay 2 (Amianance), Vigan City idi agarup 1:25 ti parbangon ti Agosto 2.

Dead on the spot gapu iti saggaysa a sugatda iti ulo ti asawa ti suspek a ni Francess Ruela Espinueva, 34, ; ti anakna a ni Carla Espinueva, 16, ken 4th year high school student; Estrelita Mendoza, 56, katuganganna a babai; ken Jeffrey Mendoza, 30, kayongna.

Nasarakan dagiti nagresponde a polis ti bangkay ni Estrelita iti baba ti dua kadsaaran a balayda; kasta met dagiti bangkay da Francess Ruela, Jeffrey ken Carla iti bukodda a kuarto.

Puersa a linuktan dagiti polis ti master’s bedroom ket nakitada a natayen ti suspek a nakaiggem iti paltogna. Sabali pay a paltog ti nakita dagiti polis iti rabaw ti kama.

Kritikal a naitaray iti Metro Vigan Cooperative Hospital ni Samantha, 7, sabali pay nga anak ti suspek ngem pimmusay kalpasan ti sumagmamano nga oras gapu iti sugatna iti ulo ken barukongna.

Nakalasat iti masaker ti katugangan a lalaki ti suspek a ni Jerry Mendoza y Sumang, 61, ken sabali pay a kayongna a kasinsin ni baketna a ni Julius Niñaga y Mendoza, 34, agsipud ta nagkumegda iti kuartoda bayat ti mapapati a panangpaltog ti suspek kadagiti kameng ti pamiliana.

Segun ken ni Vigan OIC Chief of Police Supt. Jugith Del Prado, nakarekobre ti Scene of the Crime Operatives (SOCO) iti nakapasamakan ti masaker ti maysa a cal .45 colt, empty magazine para iti caliber .45, maysa a cal .38 revolver a nabura ti serial numberna ken addaan iti empty shell ken 5 a bala, pito a kapsula ti caliber .45, 3 a bala ken 4 a buli. Naipan dagitoy iti Regional Crime Laboratory Office 1 para iti ballistics examination.

Kinuna ni del Prado a naipakatan iti paraffin test saan laeng a ti bangkay ti suspek no di pay dagiti dua a nakalasat iti masaker tapno madetermina no adda powder burns iti paltog ti imada ken mapunas aniaman a panagipapan ti partido ti suspek.

Nakarekobre pay dagiti inbestigador iti maysa a digital camera a nakakitaanda iti retrato ti suspek nga iggemna ti maysa a kuaderno a nakaipalaonan ti sumaganad a mapapati a suicide notes: “Mama weng sam and karla mahal na mahal ko kayo kaya ko nagawa ito…ayaw kong magkahiwahiwalay tayo …happy 15th year to my loving wife frances louella m espinueva i love you fram papa bong.”#