BANNER NEWS: Vigan City – napili a UNESCO World Heritage Best Practice and Conservation Management Awardee

VIGAN CITY – Sabali manen a pammadayaw ti nagun-od daytoy siudad a mangitag-ay kenkuana iti mapa ti sangalubongan, ti pannakaited kenkuana ti UNESCO World Heritage Best Practice and Conservation Management Award.

Iti interbiona kadagiti kameng ti media, impalgak ni Medina a nakaawat iti surat manipud ken ni Dr. Virginia Miralao, permanente a pannakabagi ti Pilipinas iti UNESCO, a ti Vigan City ti napili a pakaitedan ti UNESCO World Heritage Best Practice and Conservation Management Award.

Kinuna ni Mayor Eva Marie S. Medina a dina ninamnama ti pannakapili ti Vigan City a pakaitedan daytoy nga internasional award agsipud iti kinabassitna a siudad ken iti limitado a resourcesna idinto a nagyaman kadagiti nadumaduma a sektor gapu iti pannakikinnamayetda iti gobierno ti siudad para kadagiti gannuat ken programana iti pannakasalaknib ken pannakakonserba dagiti duog a sanikua ti siudad ti Vigan.

Inatiw ti Vigan City dagiti 28 nga entries manipud iti 23 a world heritage cities iti lubong iti daytoy a kaunaan nga international award a nagun-odna.

Gapu iti pannakapili ti Vigan City a pakaitedan iti UNESCO World Heritage Best Practice and Conservation Management Award, naawis ni Mayor Medina a tumabuno iti culminating program ti Maika-40th Anniversary ti World Heritage Convention a maangay  sadiay Kyoto, Japan inton Nobiembre 6-8, 2012, tapno awatenna ti Sertipiko ti Pammigbig ken iti “oportunidad” a mangiyebkas iti sumagmamano a balikas mainaig kadagiti padasda iti Vigan City a mabalin a pagtuladan dagiti dadduma a world heritage cities.

Segun ken ni Medina, iti namindua a rikus a konsultasion  ti 10-member selection committee a mangibagi iti Regional Committe Groups, advisory bodies ken ti World Heritage Center ken panangamirisda amin kadagiti submissions, tallo a puntos ti nakitada tapno maited iti historic town of Vigan ti kangatuan a butos iti Best Management Practice kadagiti amin a naisubmite: nagun-odna ti good management practice iti baet a limitado dagiti pondona a mabalin a maipakat kadagiti amin a pagilian; naipaset ti lokal a komunidad kadagiti adu nga aspeto ti konserbasion ken panangimaton iti siudad; ken naimuntar dagiti nagkaadu a wagas a pannakasalaknib iti lugar.

Dinayaw pay ti nasao nga organisasion ni Medina gapu kadagiti initiatibona iti pannakaimanehar iti siudad ti Vigan nga agserbi kas inspirasion dagiti dadduma pay a world heritage sites.

Itay laeng nabiit, napili ti Vigan City a pakaitedan iti Gawad Pamana ng Lahi iti rehion.

Awaten pay ti siudad ti Crown Award ti Nutrition iti Region gapu iti nagsasaganad a tallo a tawen a panangabakna iti Green Banner Award manipud iti National Nutrition Council. Naited daytoy a pammadayaw iti Vigan City gapu iti nasayaat a gapuananna iti pannakaitag-ay ti programa ti nutrision iti siudad.#