Footer

BANNER NEWS: Vigan City, Santa, SJNHS, napadayawan iti Rehiyon 1 Gawad Parangal ng Nutrisyon

VIGAN CITY – Naindaklan a dayaw para kadagiti agpapaay iti Nutrition Council ken opisial ti lokal a gobierno ti Vigan City ken Municipality of Santa, Ilocos Sur; ken kadagiti mangisursuro ken estudiante ti San Juan National High School, San Juan, Ilocos Sur ti pannakapadayawda iti Rehiyon 1 Gawad Parangal ng Nutrisyon ita a 2018.

Naipaay ti pammadayaw kabayatan ti naangay a taripnong ti National Nutrition Council Region 1 sadiay Vigan City Convention Center idi Agosto 30, 2018.

Napadayawan ti Vigan City kas Consistent Regional Winner on Nutrition – City Category, ken Santa kas Consistent Regional Winner on Nutrition – Municipal Category.

Nagkampeon met ti SJNHS ti Ilocos Sur Division Office iti Nutrition Month Video – Jingle Contest; 1st Runner Up ti Alaminos City National High School iti Alaminos Division Office (Pangasinan); ken 2nd Runner Up ti Mangaldan National High School iti Pangasinan Division Office.

Napadayawan met a kangrunaan a Barangay Nutrition Scholar iti Region 1 ni Ms. Aurelia Aguilar iti Brgy. Oaqui, Luna, La Union; First Runner Up ni Merlin Guanzo iti Brgy. Pantay Daya, Vigan City; ken 2nd Runner Up ni Irene Casiño ti Brgy. Palacapac, Candon City. Napadayawan met ti Provincial Green Banner Award ti Bangui, Ilocos Norte, ken Balauan, La Union.

Naipaay dagiti pammadayaw babaen dagiti opisial ti Region 1 Nutrition Council nga idauluan ni Dr. Valeriano Jesus Lopez, Chairman, ken Region 1 Director ti Department of Health, ken Dr. Azucena Dayanghirang, Deputy Executive Director ti National Nutrition Council kas pammigbig iti naindaklan a nagapuanan dagiti napadayawan iti pannakaitandudo ti nutrision kadagiti bukodda a lugar.

Indauluan ni Vigan City Mayor Juan Carlo Medina dagiti opisial ti City Government ken Nutrition Committtee iti panangawatda iti pammadayaw. Kas met laeng ti lokal a gobierno ken Nutrition Committee ti Municipality of Santa nga idauluan ni Mayor Jose Bueno Jr. Inawat met dagiti indibidual nga awardee dagiti pammadayawda, ken  dagiti pannakabagi ti SJNHS ken Ilocos Sur Division Office ti Department of EducationNakikaysa iti pasken dagiti delegado dagiti nagduduma nga ili ken siudad dagiti uppat a probinsia iti Region 1 para ti pannakapadayaw dagiti addaan iti naisangsangayan a naipaay iti pannakaitandudo ti umno a nutrision tapno malapdan ti panagkirang iti taraon ken maikkan ti nasustansia a makan dagiti umili nangruna kadagiti ubbing para iti naregta ken napigsa a pagilian.

Naisayangkat met ti Nutrition Month Video – Jingle Contest a nagsasalipan dagiti nagduduma nga eskuela ken division office ti DepEd kas panangguyugoy ti pannakikaysa dagiti ubbing ken agtutubo iti panagmula kadagiti nagduduma a nasustansia a nateng a mangipaay iti taraon tapno malapdan ti malnutrision.                                                                                                                                                                                                                                                                                                                                                                                                                                                         (Eden Alviar)