BANNER NEWS: Vigan RTC judge nasipsiputan sakbay pannakapapatayna

BANTAY, Ilocos Sur – Nasipsiputanen ti napapatay a hues ti regional trial court ti Vigan City sumagmamano a lawas sakbay ti pannakapaltogna.

Daytoy ti limtuad iti panagimbestiga ti nabuangay a task force iti pannakapapatay ni Judge Reynaldo Lacasandile, executive judge ti Regional Trial Court Branch 20 iti Vigan City, iti Barangay Lacong, Tagudin, Ilocos Sur idi parbangon ti Oktubre 4.

Segun iti panagimbestiga ti probe body, adda nakitkita dagiti kaarruba ni Lacasandile a ganggannaet a rupa nga immar-arubayan iti balay ti biktima ken nagdamdamag maipapan kenkuana sakbay ti pannakapapatayna.

Kas pammilin ni Police Chief Supt. Orlando M. Mabutas, Region I police director, binuangay ti provincial police office ditoy ti Task Force Lacasandile a binukel ti Criminal Investigation and Detection Group (CIDG), Crime Laboratory Service (CLS),  Regional Intelligence Division (RID), Regional Investigation and Detective Management Division (RIDMD), ken the Tagudin Police Station a mangisayangkat iti naun-uneg nga inbestigasion para iti madagdagus a pannakasolbar ti pannakapapatay ni Lacasandile.

Naipatulod pay ti Scene of the Crime Operation (SOCO) team iti nakapasamakan ti krimen tapno agurnong kadagiti ebidensia a makatulong iti pannakaitudo dagiti nagisayangkat iti pammapatay.

Agur-uray ni Lacasandile, 48, residente iti Barangay Salvacion, Tagudin, Ilocos Sur, iti luganna nga agpa-Vigan City iti igid ti national highway a sakup ti Barangay Lacong iti agarup alas 4:45 ti parbangon ti Oktubre 4 idi pinaltogan dagiti dua a tattao a nagkalubbon iti nalabaga a Honda motorcycle.

Naitaray ti biktima iti ospital ngem naideklara nga awanen ti biagna. Nakarekobre dagiti inbestigador iti dua a nagawangan a kapsula a nagtaud iti calibre .45 iti nakapasamakan ti krimen.

Masuspetsa a gun for hire dagiti nangpapatay ken ni Lacasandile.

Maysa nga anggulo a kitkitaen dagiti inbestigador no work-related ti makagapu iti pammapatay.

Mapapati nga adda iggem ni Lacasandile a 600 a kaso iti RTC Branch 20 sakbay a napapatay.#