Footer

BANNER NEWS:Katulagan ti restorasion ti nagkalian iti igid ti highway, nalabsing: DPWH

BANTAY, Ilocos Sur – Nabuntog ti restorasion kadagiti nagkalian ti kontraktor iti igid ti kalsada ditoy probinsia para iti pannakaipasdek ti linia ti maysa a kompania ti telekomunikasion.

“Nabuntog ti restorasion,” kinuna ni 1st Engineering District Engineer Andrelito Tagorda idinto nga inannugotna a maysa daytoy a panaglabsing iti katulaganda iti Ericsson (Globe) a kontraktor iti pannakakali ti pakaikabilan dagiti linia ti nasao nga telecommunications firm.

Impalgak ni Tagorda a nakalanad iti katulagan a simpaen ti kontraktor dagiti nagkalian iti igid ti highway iti las-ud ti lima nga aldaw ket daytoy ti violation a masansan nga itawtawagna iti nasao a kompania gapu kadagiti reklamo a dumandanon iti opisinana.

Kinuna ti district engineer a sabali ti kontraktor a nagkali ken ti kontraktor iti restorasion ket inkari ti naud-udi a rugianda ti panagisimpada kadagiti nagkalian iti igid ti kalsada iti sumuno a lawas.

Rason ti kontraktor a nataktak ti restorasion gapu iti masansan a panagtudona.

“Ti rigatna, awan met ti opisinada ditoy ket iti met Manila lattan ti pagtawtawagak,” linagidaw ni Tagorda idinto a kinunana a medio nakaunget iti manager ti telecommunications firm gapu ta saan met a masursurot ti katulagan.

“…Sakbay a naikkanda iti pammalubos nga agkali, adda depositoda a manggarantia iti faithful restoration,” kinuna ni Tagorda sana innayon a no agtultuloy ti panaglabsing ti kontraktor iti katulagan, mabalinna a kumpiskaren ti deposito daytoy tapno aramaten ti opisinada a mangsimpa kadagiti nagkalian iti igid ti kalsada.

Nagdeposito ti kontraktor iti P100,000 para iti “faithful restoration”, segun iti district engineer.

Kinuna ni Tagorda a naggigiddan ti panagkali ti kontraktor iti Sinait ken Cabugao ket naka-concentrate ita ti panagkalida iti Sto Domingo a dumanon iti Magsingal.

Manipud Banaoang, Bantay, Ilocos Sur agingga iti boundary ti Ilocos Norte daiti lugar nga inaplayan ti kompania a pagkalian para iti pannakaipasdek ti liniada.#