BANNER: P10-M pategna a marihuana, pinag-ot dagiti operatiba sadiay Sugpon, Ilocos Sur

SUGPON, Ilocos Sur – Mapattapatta nga agbalor iti nasurok sangapulo a milion dagiti mula a marihuana a pinag-ot ken pinuoran dagiti nagtitipon nga elemento ti kapolisan iti nasulinek a paset daytoy nga ili idi Septiembre 15.

Segun iti report manipud iti police station ditoy nga ili, idi agarup alas 2:00 ti parbangon ti Septiembre 15, 2015, inwayat dagiti nagtitipon nga elemento ti kapolisan ti marijuana eradication iti Barangay Licungan, ditoy nga ili.

Nagkadua ti grupo a binukel ti Sugpon Municipal Police Station; PDEA RO1; RPSB 1; PPSC, La Union; ISPPSC; PIB Ilocos Sur; ISPAIDSOTG; NISG ken Santol Police station.

Sangapulo a kadisso ti plantasion ti marihuana a nagpag-otan ti maysa a grupo idinto a dua kadisso laeng ngem nalawlawa a plantasion ti nagparutan ti maikadua a grupo.

Aglawa amin iti 1,952 metro kuadrado dagiti 10 a kadisso a plantasion ti marihuana a nagparutan iti umuna a team idinto nga aglawa iti 3,650 metro kuadrado ti dua kadisso a nagparutan ti maikadua a bunggoy.

Agdagup iti 41,900 a fully grown a mula ti marihuana, 11,200 a seedlings ken 5,000 a seedbed ti marihuana ti pinag-ot dagiti operatiba iti 12 a kadisso a plantasion a mapattapatta nga agbalor amin iti P10,948,000.00.

Nupay kasta, awan ti natiliw a caretaker wenno agtartaraken kadagiti mula a marihuana bayat ti operasion.

Pimmanaw dagiti operatiba iti nagparutanda a plantasion ti marihuana idi agarup 1:00 ti malem iti dayta met la nga aldaw.

Iti kallabes, masansan a maiwayat ti panagparut ken panagpuor kadagiti mula a marihuana a maimulmula iti nasulinek a paset ti kabambantayan iti nagbeddengan ti Ilocos Sur, Benguet ken La Union.#