BANNER: Pannakapadayaw ti Vigan a New7Wonders City: Maipagpannakkelko kas maysa a Pilipino: VP Binay

VIGAN CITY – Kinuna ni Vice President Jejomar Binay a maipagpannakkelna a maysa a Filipino ti pannakapadayaw ti Vigan kas maysa a New7Wonders Cities of the World.

“Extra proud that I am Filipino,” kinuna ni Vice President Binay idi madamag kenkuana no ania ti nariknana idi opisial a maideklara ti Vigan  City a maysa a New7Wonders City of the World.

Dinayaw ti bise presidente dagiti agtuturay iti Vigan  City nga idadauluan ni Mayor Eva Marie S. Medina gapu ta saan a natippingan ti pinget ken determinasionda a nangikampania iti Vigan iti baet ti kinaadu dagiti kinabalubalna a siudad tapno agbalin  a maysa kadagiti pito a siudad a pagsiddaawan iti sangalubongan.

“Imagine…2,200 ang total ng nag-submit… (naging) 1,200, tapos nakaabot sa finals ang Vigan. So, that’s something that I think, every Filipino is very proud of,” kinuna ni Binay bayat ti interbio a naangay kalpasan ti opisial a pannakaideklara ti Vigan City a  New7Wonders City of the World iti seremonia a naangay

Ni Binay ti kangrunaan a bisita iti inaugural ceremony ti opisial a pannakaideklara ti Vigan City a New7Wonders City a naangay iti sango ti nadaeg a simbaan ni San Pablo idi rabii ti Mayo 7. Bisita pay da Senator Cynthia Villar, Diputado Vin Gachalian, Cory Quirino ken dadduma pay a dignitario.

Kabigatanna, Mayo 8, maysa a motorcade iti aglawlaw ti Vigan ti insayangkat dagiti agtuturay  ti Vigan nga indauluan ni Mayor Eva Marie S. Medina sa iti pannakalukais ti monumento a nakaimuntaran ti marker ti panagbalin ti siudad a New7Wonders City of the World.

Idi madamag ken ni Binay no ania ti maiballakadna ken ni Mayor Medina mainaig iti panagtagilakuan, komersio ken industria tapno ad-adda pay a dumur-as ti Vigan, malaksid iti turismo, insungbat ti bise presidente a namagbalin iti Makati a sentro ti negosio iti Pilipinas idi isu ti mayor: “Naku, sa tagal ng pamumuno ni Mayor Eva,  ano pa ang maituturo ko? Ito pa ho ang dapat magturo sa ibang mga local governments. As they always say, the test of the pudding is in the eating. Anong galing ni Mayor Eva? Ito ay pwede ng bigyan ng doctorate degree sa local government.”

Kinuna met ni Medina nga adda nagkaduaan ti Makati ken Vigan City agsipud ta sister city daytoy ti Makati.

Nadakamat pay ti mayora nga idi naputed ti rangtay ti Banaoang, immay ni Binay nupay mayor pay laeng idi, naglugan iti bangka, sa nagtraysikel a nagpa-Vigan.

Kinuna ni Medina nga awan idi iti Vigan  ngem nagpatangda ken ni Binay iti babaen ti telepono ket ditoy a nasemento ti panagbalin a sister city ti Makati ti Vigan a kuna ti mayora a panagtipon ti daan ken baro.

“Nakasursurokami iti negosio ken (modernisasion) kadakuada, tapos kadakami, heritage conservation… Naggiinnadalkami manipud iti tunggal maysa,” kinuna ni Medina.

Idi sinaludsod ti maysa a reporter no ania ti ekspektaren ti Vigan City kenkuana no isunto ti mabutosan a Presidente iti Republika, kinuna ni Binay a kanayonna a dakdakamaten a maysa a lokal nga opisial ti gobierno iti 21 a tawen ket mamati a ti lokal a gobierno ti makina ti panagdur-as.

“…No siakton ti presidente, maited kadagiti lokal a gobierno amin a suporta, ikarigatak nga ikadakkel dagiti pamastrekanda ken ikkan ida iti pannarabay kas maibatay iti balligida…” kinuna ni Binay.

Innayon ni Binay a no mabutosan a presidente, karaman kadagiti prioridad nga ipakatna ti inprastruktura ket karaman ditoy ti airport, seaport, dagiti rangtay ken  kalsada a positibo a pangsuporta iti turismo.

Sakbay ti inaugural ceremony, binisita ni Binay dagiti sumagmamano nga ili iti umuna a distrito tapno sarungkaranna a mismo dagiti impaayna a proyekto kadagitoy a lugar.

Kabigatanna, nagpasiar manen  ni Binay kadagiti ili a di na napasiar.#