BANNER: Pilot instructor, estudiantena natay iti plane crash

SANTIAGO, Ilocos Sur–Narekobre dagiti bumabatok ti bagi ti piloto ken ti babai nga estudiantena manipud iti eroplano a naglugananda a naikras iti kabaybayan iti asideg ti maysa a seaside resort ditoy nga ili idi agarup alas tres ti malem ti Oktubre 21.

Bangkayen da John Kaizan Estabillo ken ni Paula Bianca Robles idi naalut-ot dagiti mammatok manipud iti eroplano  iti tukot ti baybay a nagsadsadanna agarup 20 metro iti kaadalemna ken naitakdangda idi agarup 7:30 ti bigat ti sumuno nga aldaw.

Segun iti maysa kadagiti rescuers,  simmurot dagiti biktima iti limned nga eroplano ta saanda a nalettat ti seatbeltda idi naikras daytoy iti kabaybayan kalpasan a nasapgidna ti zipline ti maysa a seaside resort iti Santiago Cove ditoy nga ili.

Iti inisial a report ti Civil Aviation Authority (CAAP), instructor  pilot ni Captain Estabillo idinto nga student pilot ni Robles ket kukua ti Leading Edge International Aviation Academy, maysa a private air flying school a nakabase iti San Fernando City, La Union, ti Cessna C-172 plane a nagluganan dagiti dua.

Mapapati a paset ti training flight ti panagtayab ti Cessna C-172 ken isasangladna iti Vigan City airport sa met la timmayab manipud iti nasao nga airport idi agarup 3:24 ti malem ket mapattapatta a sumangpet iti San Fernando City, La Union iti 4:24 ti malem iti dayta a Biernes.

Kinuna ti maysa a lumugar a nakitana ti eroplano a nababa ti tayabna a naglikos iti ngatuen ti Santiago Cove ken ti pannakasapgidna iti zipline ti maysa a beach resort a puon ti panagsuek ken pannakaikrasna iti kabaybayan.

Sabali pay a lumugar ti nagkuna a nakangeg iti napigsa a kanalbaag ket nakitana ti Cessna plane a nagsuek sa nanabsuok iti kabaybayan.

Dagus a limmugan dagiti residente iti bangkada ket nagsawarda no adda naisalakan a pasahero ken minarkaanda  ti pattapattada a nakaikrasan ti eroplano.

Nupay madama ti miting ti PDRRMC iti provincial capitol babaen ti panangidaulo ni Gov. Ryan Singson, dagus a nagturongda iti crash site idi naawatda iti flash report mainaig iti naikras a Cessna nga eroplano tapno isayangkatda ti rescue operations.

Agarup tallo nga oras bayat ti panagbatokda, maysa a diver a nagkuna a nadanonna ti nakaisadsadan ti eroplano ngem dina nakita dagiti biktima. Nupay kasta, nakaalada kadagiti sumagmamano a ramit iti uneg ti eroplano a nakatulong iti pannakabigbig dagiti biktima.

Nupay awanen ti namnama dagiti rescuers a sibibiag pay dagiti biktima, inkagumaanda nga akkalen dagitoy iti eroplano ngem napaayda gapu ta malaksid a rumabiin ken zero visibility iti uneg ti baybay, napigsa ti koriente maigapu iti kalkalpas a panangduprak ni Super typhoon Lawin iti Amianan a Luzon a pakaibilangan ti Ilocos Sur.

Kabigatanna, nasapa nga intuloy dagiti divers manipud iti Philippine Coast Guard ken Philippine Navy ti retrieval operations ket naiyaon dagiti biktima idi agarup alas siete ti bigat.

Kinuna ti CAAP a mangiwayat iti inbestigasion mainaig iti nasao a pannakaikras ti Cessna plane. (Tawid News Team)